د ماشومانو لپاره د ملګرو ملتونو ادارې (یونېسېف) له یوشمېر افغان ماشومانو سره نوې مرستې اعلان کړې.
د دې سازمان افغانستان څانګې د مارچ پر شپږمه پر ټوېټر لیکلي چې د مایکروسافت شرکت د بنسټګر بېل ګېټس بنسټ په همکارۍ یې په هغه هېواد کې پر اړمنو ماشومانو ۱۵،۰۰۰ کومکي بستې وېشلې دي. د سازمان په وینا، په دې مرستو کې د ماشومانو لپاره کمپلې او حیاتي واکسینونه شامل دي.
د ۲۰۲۱ز کال د اګست په نیمايي کې پر افغانستان د طالبانو تر واکمنېدو وروسته ملګرو ملتونو د ماشومانو وضعیت د اندېښنې وړ بللی دی.
یونېسېف د مارچ پر څلورمه اعلان وکړ چې په افغانستان کې یې له ماشومانو سره د مرستې لپاره د دوه میلیارده یا اربه ډالرو له ژمنې یوازې ۱۵ سلنه ترلاسه کړې ده.