د شمالي وزیرستان چارواکي وايي چې په دته خېل سیمه کې د وسله والو په ډزو کې ۳ منیتي سرتیري وژل شوي او ۲ نور ټپیان شوي دي.
امنیتي او استخباراتي چارواکو چې نه یې غوښتل د موضوع د حساسیت له امله یې نومونه واخیستل شي، د مارچ په ۲۴مه مشال راډیو ته وویل چې دا برید نن سهار په یوې امنیتي پوسته ترسره شوی او د پاکستان امنیتي ځواکونو هم ځوابي ډزې کړي دي.
دغه چارواکي زیاتوي ژوبل شوي سرتیري یې د بنو پوځي روغتون ته منتقل کړي دي. د برید ذمه واري تر اوسه چه نه ده منلې.
په شمالي وزیرستان کې په دې وروستيو کې بريدونه زیات شوي دي. تحریک طالبان پاکستان د شمالي وزیرستان په دوسلي کې د مارچ په ۲۳ مه د امنیتي ځواکونو پر یوې پوسته د برید او د یو امنیتي سرتیري د وژلو ادعا کړی وه. چارواکیو لا په دې اړه څه نه دي ویلي.
دا په داسې حال کې ده چې د پاکستان امنیتي ځواکونو په سیمه کې پراخ عملیات ترسره کړي او ترهګرو ته د ماتې ورکولو ادعاوې کوي خو بیا هم په سیمه کې امنيتي حالات ترینګلي دی او پر ځایي خلکو او امنیتي ځواکونو د بریدونو لړۍ دوام لري.