د هند غوره ليګ شل اووریزې کرکټ سیالۍ د مارچ په ۲۶مه د دې هېواد په ممبۍ کې پيل شوې.
لومړۍ لوبه د کولکته نایټ رايډرز او چنای سپرکینګز ترمنځ وشوه. چنای سپرکینګز د لومړي بېټينګ په کولو سره په مقررو شل اوورونو کې د ۵ لوبغاړو په اوټ کېدو ۱۳۱ رنزونه جوړ کړل. کولکته نایټ رایډرز دا هدف د څلو ويکټو په زیان په اتلس اعشاريه درې اوورونو کې پوره کړ. د کولکته نایټ رایډرز امېش یادو په څلورو اوورنو کې ۲۰ رنزونه ورکړل او ۳ لوبغاړي یې اوټ کړل نو ځکه د مېچ غوره لوبغاړی ونومول شو.
د هند غوره ليګ (Indian Premier League) سیالۍ د دې هېواد کرکټ بورډ په ۲۰۰۷ کال کې پيل کړې وي. دا کال پينځلسم ځل دی چې دغه لوبې کيږي. په دې ټورنمنټکې لوبېدونکې لوبډلې بېلابېل کلبونه دي چې د نړۍ له بېلابېلو هېوادونو پکې لوبغاړي اخیستل کيږي.
دا ځل په دې ټورنمنټ کې لس لوبډلې ګډون کوي او ۷۵ لوبې به کيږي. پايلوبه به د مې په ۲۹مه وي.