د پاکستان قامي اقتصادي شورا په هېواد کې د توانايي بحران کمولو لپاره بازارونه او مارکېټونه د شپې پر اته بجې بندولو باندې "اصولي اتفاق" کړی دی.
پرون (د جون پر اتمه) د وزیراعظم له دفتره په خپاره شوي بيان کې ويل شوي چې د وزيراعظم شهباز شريف په مشرۍ په دې غونډه کې د پنجاب، سيند او بلوچستان اعلا وزيرانو ګډون کړی و خو د خيبر پښتونخوا استازيتوب صوبايي چيف سېکرټري ډاکټر شهزاد خان بنګش وکړ.
په ياده غونډه کې د سيند، پنجاب او بلوچستان اعلا وزيرانو دوه ورځې مهلت غوښتی چې د خپلو صوبو له تجارتي او کاروباري ټولنو سره په دې اړه سلا مشوره وکړي.
بلخوا د خيبر پښتونخوا د روغتيا وزير تېمور سيلم جګړا د جون پر اتمه پر خپلې ټويټر پاڼې ليکلې چې په صوبه کې مارکېټونه د شپي پر اته بجې بندولو باندې اتفاق نه دی شوی.
KP has not agreed to this. It was put forward that KP will decide, after consultation with the CM @IMMahmoodKhan. https://t.co/MYu3SLy4C6
— Taimur Khan Jhagra (@Jhagra) June 8, 2022
تر دې وړاندې د پاکستان حکومت د هېواد د اقتصادي حالت سمولو لپاره د کفایت شعارۍ د پروګرام عملي کولو اعلان هم کړی دی.
په دې لړ کې د جون پر اوومه د وزیراعظم شهباز شریف په مشرۍ د کابینې په غونډه کې د حکومتي لګښتونو کمولو پرېکړه وشوه. په غونډه کې فیصله وشوه چې وزیران او سرکاري چارواکي به د پېټرولو او ډیزلو استعمال ۴۰ فیصده کموي، حکومت به سرکاري چارواکو ته نوي ګاډي نه ورکوي او هغوی به پر سرکاري خرڅ بهرنیو هېوادونو ته سفر نه کوي.
حکومت کا ملکی معاشی صورتحال اور توانائی بچت کے پیشِ نظر کفایت شعاری مہم کا آغاز۔#GovtAtWork #WeHaveWeCanWeWill pic.twitter.com/5TVhnH9ECT
— Government of Pakistan (@GovtofPakistan) June 8, 2022
د پاکستان حکومت دا اعلان په داسې وخت کې کړی چې هېواد له اقتصادي ستونزو او د توانايي له بحران سره مخامخ دی.
په همدې اړه پرون (د جون پر اتمه) د پيښور يوې "قامي جرګې" د پاکستان له مرکزي حکومته غوښتنه کړې چې په هېواد کې دې پرګرانۍ د قابو موندلو لپاره "بېړنی اقتصادي حالت" اعلان کړي.
دغې جرګې په چوک يادګار کې احتجاجي غونډه وکړه چې د سوداګرانو د ټولنو مشرانو، مدني فعالانو، وکيلانو او سياسي فعالانو ګډون پکې کړی و.
د جرګې يوه ګډونوال حبيب الله زاهد غونډې ته وويل چې حکومت دې د هېواد اقتصادي حالت ښه کولو لپاره د ټېکسونو او د خوراکي او غير خوراکي توکو په بيو کې په زياتوالي سره د ګرانۍ بار د "غريب ولس" پر اوږو له اچولو ډډه وکړي.
نوموړي زياته کړه چې د لوړ پوړيو سرکاري افسرانو د لګښتونو په کمولو سره تر څه حده پورې اقتصاد ښه کېدای شي.
دا هم وګورئ: شهباز شریف: پاکستان له سختو اقتصادي مشکلاتو سره مخامخ دیبلخوا د "پېښور قامي جرګې" مشر خالد ايوب تر جرګې وروسته مشال راډيو ته وويل چې د ګرانۍ پرضد به د خيبر پښتونخوا په نورو برخو کې هم احتجاجي غونډې کوي.
هغه زياته کړه چې حکومت د تېلو بيې لوړې کړي خو په دې سره ټېکسونه هم ډېر زيات شوي دي چې له وجې يې ګراني زياته شوې ده.
جرګې د بېړني اقتصادي حالت غوښتنه په داسي حال کې کړي چې وفاقي حکومت په ګرانۍ او په ملک کې د توانايي په بحران قابو موندلو لپاره ځيني ګامونه پورته کړي دي.
د پاکستان په قامي اسمبلۍ کې د دې هېواد د پخواني وزيراعظم عمران خان پر ضد د عدم اعتماد تحريک تر بريالي کېدو وروسته د روان کال (۲۰۲۲ز) په اپرېل مياشت کې د وزيراعظم شهباز شريف په مشرۍايتلافي حکومت جوړ شو.
موجوده حکومت دريځ لري چې اقتصادي ستونزې ورته د پاکستان تحریک انصاف ګوند په مشرۍ تېر حکومت څخه په میراث کې ورپاتې دي چې دوی يې د هواري هڅې کوي، خو عمران بيا د جون پر اتمه په يو بيان کې ويلي چې د ده د حکومت په درې نيمو کلونو کې دومره زياته ګراني نه وه څومره چې په تېرو دوو مياشتو کې راغلې ده.