د پاکستان حکومت هغو افغانانو ته د ټرانزيت وېزو ورکولو پرېکړه کړي چې له دغه هېواده د نړۍ نورو هېوادونو ته سفر کوي.
د وفاقي کابینې د پرېکړې له مخې درېیمو هېوادونو ته تلونکي افغانان به له دې وروسته پاکستان ته په رسېدو سره سم یا On Arrival وېزې ترلاسه کړي.
وزيراعظم شهبازشریف د جون پر ۱۲مه پر ټوېټر ليکلي چې افغان وګړو ته د ټرانزیټ ویزو ورکړه به "له هغوی سره د راتلونکي سفر لپاره د کاغذي کارونو په بشپړولو کې مرسته وکړي."
هغه زیاته کړې، "د حکومت لخوا د افغان ویزې نوې پالیسي زموږ د هڅو یوه برخه ده چې د اړتیا په وخت کې خپلو افغان وروڼو او خویندو سره مرستې ته دوام ورکړو."
New Afghan visa policy by our govt is part of our efforts to continue helping our Afghan brothers & sisters in their hour of need. Grant of transit visa will help them complete paperwork for onward travel. International community should also lend a helping hand to people of 🇦🇫
— Shehbaz Sharif (@CMShehbaz) June 12, 2022
په پاکستان کې په زرګونو هغه افغانان بهر هېوادونو ته د تګ په تمه اوسیږي چې په افغانستان کې د ۲۰۲۱ کال د اګست په ۱۵مه د طالبانو د واکمنۍ تر پيل وروسته یې غربي ملکونو کې د پناه اخیستو غوښتنليکونه ورکړي دي. په دوی کې اکثره یې خبریالان، د بشري حقونو فعالانو او هنرمندان دي.
د پاکستان د ټرانزیټ وېزو اسانولو وروسته، که افغانان د نورو هېوادونو سفارتونو ته ورځي او یا د سفر لپاره اسناد برابروي نو کولای شي تر یو څه وخته پورې په پاکستان کې په قانوني ډول پاتې شي.
د طالبانو په بیا واکمنېدو که څه هم څه باندې ۱۲۴ زره کسان له کابله په مستقیمو پروازونو کې بهر یوړل شول خو تر هغه را وروسته بهر لویدیځ ته د کډوالۍ په تکل ګڼ افغانان د پاکستان له لارې سفر کوي.
پاکستان داسې وخت د دغو افغانانو لپاره د ټرانزیټ ویزو اسانتیا رامنځته کړه چې تېرو څو اونیو کې په کابل کې د پاکستان سفارت ډېرو افغانانو ته ویزې نه ورکولې او دلیل یې دا راوړی وو چې د دغو خلکو فارمونه او غوښتنلیکونه نيمګړي وي.