په خيبر پښتونخوا کې د قدرتي افتونو د نظم اداره (پي ډي اېم اې) وايي، د خیبر ضلعې د لیرې پرتو سیمو پاتې شويو کډوالو د ستنېدو لړۍ به روانه میاشت پیلوي.
د ادارې وياند احسان داوړ د جون پر ۲۳مه مشال راډيو ته وويل چې د باړې، جمرود او لواړګي له لیرې پرتو سيمو څخه د بې کوره شويو کسانو ستنولو لپاره په جمرود کې مرکز پرانیستل شوی دی.
هغې ادارې همداراز د جون پر ۲۳مه په يو بيان کې ويلي ول چې د جون له ۲۶مې تر ۲۸مې به د باړې او تيرا کډوال خپلو سيمو ته ستنوي.
ادارې ویلي ول چې د جون پر ۲۹مه به په جمرود کې مېشت د راجګل سيمې کډوال او د جون پر ۳۰مه به د لنډي کوتل د زخه خېلو کډوال خپلو سيمو ته ستانه کړي.
د خيبر چارواکي وايي چې په باړه او تیرا کې له ۲۰۰۸ز څخه تر ۲۰۱۶ز کال پورې د وسله والو ضد د پوځي عملياتو په نتيجه کې تر یو لک زیاتې کورنۍ بې کوره شوې وې.
د دوی په وینا، له هغو څخه یې ۸۶،۰۰۰ کورنۍ ثبت شوې وې او زياتره غړي یې خپلو سيمو ته ستانه شوي دي.