د پاکستان د ټاکنو کمېشن غېر حتمي نتيجې ښيي چې پاکستان تحريک انصاف د پنجاب اسمبلۍ په ضمني ټاکنو کې په ۲۰ کې ۱۵ څوکۍ ګټلې دي.
د هغه هېواد د انتخاباتي کمېشن وياند هارون شینواري د جولای پر ۱۷مه نېټه د شپې ناوخته پر خپل ټوېټر پاڼه د برياليو کانديدانو يو لېسټ خپور کړی دی. د دې نوملړ له مخې، په ۲۰ څوکيو کې ۱۵ تحريک انصاف، څلور واکمن ګوند پاکستان مسلم ليګ (ن) او يوه ازاد امېدوار ګټلې ده.
— Haroon Shinwari, Spokesperson ECP (@HaroonS2021) July 18, 2022
دا انتخابات د جولای پر ۱۷مه نېټه وشول چې پکې د مسلم ليګ (ن) او تحريک انصاف د امېدوارانو ترمینځ د سختې مقابلې تمه کېدله. د ټاکنو د امنيت دنده د پاکستان پوځ ته سپارل شوې وه او له ۲،۰۰۰ څخه زیات اېف سي يا د سرحدي ځواکونو سرتېري هم ورسره مل ول.
د تحريک انصاف مشر عمران خان د ګوند تر بريا وروسته د جولای پر ۱۷مه د ټوېټر پاڼې له لارې د خپلې پارټۍ د غړو او اتحاديانو مننه کړې ده. هغه ليکلي چې اوس يوازينی حل د يوه باوري انتخاباتي کمېشن له لارې شفافه ټاکنې کول دي. نوموړي زیاته کړې، له دې پرته به بله هر لار دا هېواد د نورې سياسي بې ثباتۍ او معاشي تباهۍ خوا ته روان کړي.
د پنجاب واکمن ګوند مسلم ليګ (ن) د ټاکنو نتيجې منلې دي. د ګوند مرستيالې مشرې مريم نواز د جولای پر ۱۷مه نېټه پر ټوېټر ليکلي چې مسلم ليګ (ن) بايد د انتخاباتو نتيجې ومني او د ولس پرېکړې ته سر ښکته کړي. د دې په وينا، په سياست کې ګټل او بایلل وي.
مسلم لیگ ن کو کھلے دل سے نتائج تسلیم کرنا چاہییں۔ عوام کے فیصلے کے سامنے سر جھکانا چاہیے۔ سیاست میں ہار جیت ہوتی رہتی ہے۔ دل بڑا کرنا چاہیے۔ جہاں جہاں کمزوریاں ہیں، ان کی نشاندہی کر کے انھیں دور کرنے کے لیے محنت کرنی چاہیے۔ انشاءاللّہ خیر ہو گی۔
— Maryam Nawaz Sharif (@MaryamNSharif) July 17, 2022
پر هغو ۲۰ څوکيو له هغه وروسته ضمني ټاکنې شوې چې د پاکستان انتخاباتي کمېشن د مې پر ۲۰مه د تحريک انصاف د هغو ۲۵ غړو د اسمبلۍ رکنيت ختم کړی وو چې د پنجاب د وزیراعلا د ټاکنو پر مهال يې د خپل ګوند د کانديد پر ځای د مسلم ليګ (ن) امېدوار حمزه شهباز ته رایې ورکړې وې.
د پنجاب اسمبلۍ سپیکر چودري پروېز الهي د هغو غړو د وفادارۍ بدلولو پرضد غوښتنليک دایر کړی وو. په دې کې پينځه غړي پر ځانګړو (مخصوصو) څوکيو ټاکل شوي ول. کمېشن دا ګام د سپریم کورټ تر هغې پرېکړې یوه اوونۍ وروسته اخیستی وو چې پکې عدالت ویلي ول چې که یو غړی د خپل سیاسي ګوند "له خوښې پرته رايه ورکړي نو نه به شمارل کېږي.