د امريکا د نيويارک ايالت پوليسو د هغه تن شناخت معلوم کړی دی چې په مبينه توګه يې پر ليکوال سلمان رشدي برید کړی دی.
پوليس فکر کوي چې دا تن د اګست پر ۱۲مه په يوازې ځان برید کړی دی.
پوليسو په يوه خبري غونډه کې وويل کوم مشکوکه تن چې د پېښې له ځای څخه نیول شوی هغه هادي مطر نومېږي چې عمر یې ۲۴ کاله او د نیوجرسي اوسېدونکی دی.
بل پلو چارواکي وايي چې تر پېښه څو ساعته وروسته هم د سلمان رشدي عملیات روان دي.
په دې عکس کې هغه ځای ښکاري چې پر سلمان رشدي برید شوی وو
دا له هغه وروسته ده چې د اګست پر ۱۲مه سلمان رشدي په يوه اداره کې تر لېکچر ورکولو لږ مخکې په چاکو ووهل شو . پوليس وايي تر دستورې مخکې د هیڅ خطر نښې نه وې.
نيويارک پوليسو په يو بيان کې وېلي دي چې سلمان رشدي چې په ظاهره يې پر څټ د چاکو د ګزارونو زخمونه دي، د سيمې روغتون ته په هېلي کاپټر کې وړل شوی دی.
د امریکا د ملي امنیت سلاکار جېک سولیوان پر ټویټر لیکلي چې پر سلمان رشدي برید ډاروونکی دی.
نوموړي زیاته کړې چې، " موږ د ده د چټکې روغتیا لپاره دعاګانې کوو، د هغو ښو ښاریانو مننه کوو چې ډېر په چټکۍ یې د ده مرسته کړې ده."
۷۵ کلن سلمان رشدي د "سېټانک ورسز" یا د "شېطاني ایت" په نامه د هغه کتاب ليکوال دی چې زياتره مسلمانان يې د خپل مذهب سپکاوی بولي.
په ايران کې نه یوازې پر دې کتاب بنديز لګول شوی وو بلکې سلمان رشدي ته یې د مرګ ګواښونه هم کړي وو او نوموړي څو کلونه په پټه ژوند کاوی.
دا کتاب چې کله په ۱۹۸۸ م کال کې چاپ شو نو د ايران د هغه وخت ستر مشر ایت الله روح الله خميني یو کال وروسته د سلمان رشدي د مرګ فتوا جاري کړې وه.