د خیبر پښتونخوا د سوات سوداګرو اتحادیې او جماعت اسلامي ګوند په ملاکنډ ډويژن کې د ټېکسونو لګولو مخالفت کړی دی.
د جماعت اسلامي ځايي مشر او د صوبايي اسمبلۍ پخواني غړي محمد امین د اکتوبر پر ۲۴مه په سوات کې خبري غونډې ته وویل چې يو خوا دا سيمه ځانګړی حيثیت لري او بل پلو ترهګرۍ او سېلابونو هم ځپلې ده.
د ملاکنډ ډويژن د سوداګرو اتحادیې مشر عبدالرحیم مشال راډیو ته وویل چې دوی نه خو له پخوا نېغ په نېغه ټېکسونه منلي او نه به یې اوس ومني.
له سواته د واکمن پاکستان تحریک انصاف ګوند غړي فضل حکیم مشال راډیو ته وویل، دوی به له صوبايي حکومت څخه غوښتنه کوي چې ټېکسونه دې معاف کړي.
د پاکستان وفاقي حکومت چې کله په ۲۰۱۸ز کال کې د ملاکنډ ډويژن ځانګړی حيثیت له مينځه يووړ نو دې سیمې ته یې تر پينځو کلونو پورې ټېکسونه معاف کړي ول. هغه موده په ۲۰۲۳م کې پای ته رسېږي.