د کراچۍ د ناظم اباد په مجاهد کالونۍ کې پولیسو د تجاوزاتو پرضد د روانې کاروایي خلاف ګڼ شمېر احتجاج کوونکي وهلي ټکولي او کڼ شمېر یې نیولي دي.
د پولیسو له خوا دا کاروايي د نومبر پر ۲۱مه پر داسې مهال شوې چې په مجاهد کالونۍ کې پر تجاوزاتو د جوړو کورونو ړنګولو خلاف ځايي خلکو احتجاج پیل کړ.
د پولیسو له خوا پر هغوی اوښکې بهېوونکی ګېس غورځول شوی او د یو شمېر نارینه وو تر څنګ یې ښځینه مظاهرچیانې هم نیولې او بندي کړې دي.
د پولیسو د دې کاروايي ویډیوګانې چې پر ټولنیزو رسنیو خپرې شوې نو سیاسنوالو او د بشري حقونو فعالانو یې پرضد غږ پورته کړ او د سیند پولیسو دا کړنه یې وغندله.
د مجاهد کالونۍ متاثرین د پولیسو چلند غندلی او له سیند حکومت څخه یې د دوی د کورنونو نه نړولو غوښتنه کړې ده
په دې سیمه کې له کلونو راهيسې مېشت خلک وايي حکومت په داسې وخت کې ناڅاپي د دوی له سرونو چت ليرې کړ چې هلته ژمی پر پیلېدو دی.
دوی وايي، اوس بې سرپناه شوي او د ماشومانو د ساتنې ځای نه لري ځکه چې د دوی په وینا حکومت ورته په بدل کې هم څه نه دي ورکړي.
دوی وايي له کلونو راهيسې هلته مېشت دي، د بجلۍ، ګېس او اوبو بلونه هم په منظم ډول هر میاشت ورکوي خو اوس دغه کالونۍ ناڅاپه غیرقانوني اعلان شوې ده.
د کراچۍ بېلا بېلو سیاسي ګوندونو د سیند پر حکومت غږ کړی دی چې د کراچۍ د مرکزي ضلعې په مجاهد کالونۍ کې روان کړي دا عملیات دې په سمدستي توګه ودروي.
دوی په سیند کې د واکمن پاکستان پیپلز ګوند حکومت تورن کړی دی چې دا هر څه د ځان د ګټې لپاره کوي. دوی د سیند حکومت ته خبرداری ورکړی چې که د غریبو خلکو د کورونو ړنګولو عملیات بند نه کړل شي نو د اعلا وزیر د کور مخې ته به احتجاج وکړي.
د سیند حکومت د دې ګام پرضد په غږ پورته کوونکو کې د متحده قومي موومنټ پاکستان پخوانی مشر ډاکټر فاروق ستار، د پاکستان تحریک انصاف د سیند اسمبلۍ غړی خرم شیر زمان، د عوامي نېشنل ګوند د سیند مشر شاهي سید او د جمعیت علمای اسلام (ف) یو ځايي مشر قاري عثمان شامل دي.
د ملي جمهوري غورځنګ مشر او د پاکستان په قامي اسمبلۍ کې د بهرنيو چارو کمېټۍ مشر محسن داوړ هم پر خپله ټويټر پاڼه د کورونو ړنګولو پر مهال د پوليسو له خوا له استوګنو سره چلند غندلی او ليکلي يې دي چې "د پوليسو له خوا پر احتجاج کوونکو ښځو بريد شرمناکه عمل دی."
The brutality with which the police in Karachi attacked women protesting against the demolition of their homes in Mujahid Colony is shameful. I raised this issue in the NA. Hope Sindh govt will take notice. Subjecting peaceful protesters to violence is never acceptable. pic.twitter.com/gDjvYDU5Ql
— Mohsin Dawar (@mjdawar) November 21, 2022
د کراچۍ په مجاهد کالونۍ کې زیاتره اوسېدونکي پښتانه دي. په کراچۍ کې د پښتون ژغورنې غورځنګ له خوا څو ځله د دې خلکو لپاره احتجاجونه شوي دي.
دوی تور پورې کوي چې د سیند حکومت یوازې په دې سیمه کې هغه کورونه او ودانۍ ړنګوي چې ملکیت یې د پښتنو دی خو د سیند حکومتي چارواکي دا تور ردوي.
د پښتون ژغورنې غورځنګ مشر منظور پښتین پر ټویټر په یو بیان کې د دې پېښې غندنه کړې او ویلي یې دي چې د دې خلکو لپاره به دوی احتجاج جاري ساتي.
کراچی مجاہد کالونی پر آج ایک بار پھر پولیس کا حملہ۔ گھروں کے خواتین پر تشدد اور گرفتاریاں، تمام گھروں سے لوگوں کو نکالنے کی کوششیں۔مجاہد کالونی میں 1952 سے پشتون آباد ہے مگر موجودہ دور میں تشدد و بربریت کرکے انکو گھروں سے نکالا جارہا ہے۔اس ظلم کے خلاف PTM سندھ کا احتجاج جاری ہے https://t.co/RcSLq1uWXo
— Manzoor Pashteen (@ManzoorPashteen) November 21, 2022
بلخوا د کراچۍ د پرمختګ ادارې "کې ډي اې" ويلي چې په مجاهد کالونۍ او وحيد کالونۍ کې پر حکومتي مځکه د قبضې تر ختمولو وروستو به د پينځه کروړه روپیو په لګښت له ناظم اباده تر ضياوالدين هسپتال پورې ۱۵۰ فټه پراخ سړک جوړوي.
د یادې ادارې مشر محمد علي شاه وایي چي تر اوسه۶۰ فیصده مځکه له تجاوزاتو خلاصه شوې ده.
دې ادارې د ۲۰۲۲ز کال د اګست پر ۲۸مه د وحید کالونۍ اوسېدونکو ته د اېستل کېدو خبرداری ورکړی وو. یادې ادارې د اكتوبر پر ۱۴مه نېټه يو ځل بيا هغه خبرداری تکرار کړی وو.
د ادارې چارواکي وايي چې د دې کالونۍ اوسېدونکو د دوی پر خبرداري له عمل کولو ډډه کړې او په داسې حال کې یې له تشدده په ډکو احتجاجونو پیل کړی چې د ملکیت هېڅ قانوني اسناد نه لري.
بلخوا د مجاهد کالونۍ ۱۱ اغېزمنو اوسېدونکو د سیند په های کورټ کې هم خواست کړی وو خو عدالت د اکتوبر پر ۳۱مه نېټه دا درخواست رد کړی وو.