اروپایي ټولنې په افغانستان کې د طالبانو له حکومته غوښتي چې سمدستي دې ټولو نجونو ته د تعليم اجازه ورکړي.
د اروپايي ټولنې مرستيال او د اروپايي کمېشن د بهرنۍ پالیسۍ مشر جوزیپ بوریل د جنورۍ پر ۲۳مه، په يوه خبرپاڼه کې وويل چې د ښونځیو تړل د طالبانو د پخوانیو ژمنو خلاف عمل دی.
د دغې ټولنې پر وېبپاڼه خپره شوې خبرپاڼه کې راغلي چې اروپایي ټولنه هیله لري چې د طالبانو حکومت له افغانانو سره کړې ژمنې عملي کړي.
اروپایي ټولنې نجونه له تعلیمه او ښځې له کاره منع کول، د افغانستان لپاره لوی شاتګ بللی او ټینګار یې کړی چې د یوه پر ځان بسیا او با ثباته افغانستان لپاره د ښځو زدهکړې مهمې دي.
طالبانو د ۲۰۲۱ کال په اګست کې د افغانستان حکومت نیولی. له هغه وخت وروسته یې له پينځم ټولګيپورته د نجونو پر زده کړو بندیز لګولی او ښځې یې په غيرسرکاري ادارو کې له کاره منع کړي دي.