د پاکستان د انتخاباتو کمېشن اعلان کړی چې د قامي اسمبلۍ پر هغو ۳۳ چوکیو به ضمني ټاکنې کوي چې د پاکستان تحریک انصاف ګوند د غړو تر استعفا وروسته خالي شوې دي.
د انتخاباتو کمېشن د جنورۍ پر ۲۷مه په یو خبرپاڼه کې ویلي چې پر دې چوکیو به د ۲۰۲۳ز کال د مارچ پر ۱۶مه نېټه انتخابات کېږي.
په خبرپاڼه کې ویل شوي چې په دې انتخاباتو کې برخه اخیستونکي کاندیدان کولای شي چې د فبرورۍ له شپږمې تر اتمې نېټې خپل اسناد د انتخاباتو کمېشن ته وړاندې کړي.
دا بیاځلي یا ضمني ټاکنې به د خېبر پښتونخوا پر اتو، د پنجاب پر ۱۲، د سیند پر نهو، د اسلام اباد پر درو او د بلوچستان پر یوه چوکۍ ترسره کېږي.
د پاکستان د قامي اسمبلۍ دا چوکۍ له هغه وروسته خالي شوې وې چې د یادې اسمبلۍ سپیکر د پاکستان تحریک انصاف ګوند د غړو له خوا ورکړل شوې استعفاګانې ومنلې.
د پاکستان تحریک انصاف غړو هغه وخت له قامي اسبملۍ استعفاګانې ورکړې چې د ۲۰۲۲ز کال د اپرېل پر ۱۰مه د یاد ګوند مشر عمران خان په قامي اسمبلۍ کې د بې باورۍ تحريک له لارې له وزیراعظمۍ ليرې کړل شو.