په بلوچستان کې په دوو وسله والو بريدونو کې يو پوليس او يو لېوي چارواکی وژل شوي او دوه پوليسان ژوبل دي.
پرون (د جنورۍ په ۲۷مه) قلات ښار ته څېرمه د ملغزې په سیمه کې د مرستیال اېس اېچ او نذیر احمد عمراني په مشرۍ پولیسو ګشت کولو چې نامعلومو وسله والو پرې ډزې وکړې چې په کې د نذیر احمد په ګډون څلور پوليسان سخت ژوبل شول خو وروسته روغتون ته پر لاره یو سپاهي ساه ورکړه.
بلخوا هم پرون (د جنورۍ په ۲۷مه) د بولان ضلعې په بالا ناړۍ سیمه کې وسله والو په لېوي چېک پوسته بريد کې د خالد حسین په نوم لېوي چارواکی ووژلو.
د يادو دواړو پېښو زمه واري تر دې دمه چا نه ده منلې.
بلخوا د بلوچستان اعلا وزیر میرعبدالقدوس بزنجو او د بلوچستان د کورنيو چارو صوبايي وزیر میرضیاء لانګو په جلا جلا بیانونو کې ویلي دي چې په يادو پېښو کې د تورونو کسانو د نیولو لپاره يې ګامونه پورته کړي دي.
د یادونې وړ ده چي د جنورۍ په ۲۶مه هم وسله والو د کوټې د هوايی ډګر یو امنیتي ساتونکی په ډزو وژلی وو چې وروسته یې تحریک طالبان پاکستان زمه واري منلې وه.