د بلوچستان د بارکان ضلعې په وړوکي ښار رکڼۍ کې په چاودنه کې لږترلږه څلور تنه وژل شوي او اته ژوبل دي.
د رکڼۍ د لېویزو تحصیلدار محمد سلیم مشال راډیو ته وویل چې چاودنه د فبرورۍ پر ۲۶مه سهار شاوخوا نهه نیمې بجې شوې ده.
ده وویل چې بم په یو موټرسایکل کې ایښوول شوی وو.
محمد سلیم زیاته کړه چې ژوبل کسان د درملنې لپاره د پنجاب صوبې ډېره غازي خان ته لېږدول شوي دي.
رکڼۍ د بلوچستان د بارکان ضلعې هغه ښارګوټی دی چې له پنجاب صوبې سره پر پوله پروت دی. بارکان له مرکز کوټې څخه شاوخوا ۵۰۰ کېلومیټره لیرې ختیځ لوري ته پرته ضلع ده.
د پېښې ذمه واري چا نه ده منلې خو د پاکستان دولتي راډیو وايي، وزیراعظم شهباز شریف، ولسمشر عارف علوي او د کورنیو چارو وزیر رانا ثنا الله د چاودنې غندنه کړې او هغه یې "د ترهګرۍ پېښه" بللې ده.
د بلوچستان اعلا وزیر عبدالقدوس برنجو هم پېښه غندلې او د کورنیو چارو وزارت ته یې امر کړی چې له سره دې "د ترهګرۍ ضد د تګلارې" جاج واخلي.