د افغانستان لپاره د پاکستان ځانګړي استازي محمد صادق له خپلې دندې استعفا کړې ده.
نوموړي د مارچ پر لومړۍ پر خپله رسمي ټوېټر پاڼه لیکلي چې شاوخوا درې کاله یې دا دنده ترسره کړه او اوس استعفا ورکوي.
محمد صادق د خپلې دندې پر مهال د افغانستان او پاکستان ترمینځ د اړیکو ښه کولو د هڅو لپاره د د وزیراعظم شهباز شریف او خپلو ټولو همکارانو مننه کړې ده.
نوموړي د استعفا ورکولو په اړه نور معلومات نه دي ورکړي خو یوازې یې دا ویلي چې غواړي نور خپل "شخصي" ژوند او کارونو ته وخت ورکړي.
صادق پخواني وزیراعظم عمران خان د ۲۰۲۰ز کال په جون کې د افغانستان لپاره ځانګړی استازی ټاکلی وو.
نوموړی په ۲۰۱۶ز کال کې د پاکستان د بهرنیو چارو وزارت د ملي امنیت له څانګې څخه د سېکرټر په حیث تقاعد شوی وو. دی تر دې مخکې له ۲۰۰۸ز څخه تر ۲۰۱۴ پورې په افغانستان کې د پاکستان سفیر وو.
له دې پرته صادق تر یو نیم کال پورې د پاکستان د بهرنیو چارو د وزارت ویاند په توګه هم کار کړی دی.