د پاکستان پارلمان د دې منظوري ورکړې ده چې په ملک کې دې د صوبايي او قومي اسمبلۍ لپاره انتخابات پر یوه وخت وکړل شي.
دا منظوري د هغه قرارداد په منظورولو سره ورکړل شوې ده چې د اپرېل پر لسمه نېټه پارلمان ته وړاندې کړل شو.
په قرارداد کې ویل شوي چې په ملک کې د اقتصادي ثبات لپاره سياسي ثبات ضروري دی نو ځکه دې د ټولو اسمبلیو ټاکنې له ایین سره سمې د نګران حکومت تر څارنه لاندې ترسره شي.
قرارداد زیاته کړې چې په پنجاب کې د پارلمان تر ټولو زیاتو چوکۍ دي نو هلته تر نورو وړاندې انتخابات به پر نورو صوبو منفي اغېز وکړي.
د قومي اسمبلۍ پر رسمي ټویټر پاڼه ورکړل شوي چې د پارلمان د شریکې غونډې کارروايي د مې میاشتې تر ۱۵مې ڼېټې ځنډول شوې ده.
دا له هغه وروسته ده چې د پاکستان وفاقي کابینې پرېکړه وکړه چې د ټاکنو کولو لپاره د پيسو بېلولو په اړه د سپريم کورټ پر فیصله دې په پارليمان کې بحث وشي.
د وزيراعظم شهباز شريف دفتر د اپريل پر نهمه رسنيو ته په ليږلې يوه خبرپاڼه کې ويلي چې کابینې پر دې مسله اوږد بحث وکړ او مناسبه وګڼل شوه چې نورې خبرې پرې په پارليمان کې د خلکو استازي وکړي.
خبرپاڼه لیکي چې د قانون وفاقي وزیر سېنېټر اعظم نزیر تارړ د روانو سیاسي او اییني مسلو د بېلا بېلو قانوني اړخونو په اړه د کابینې غونډې ته معلومات ورکړل او د غونډې د ګډونوالو پوښتنې یې ځواب کړې.
ستاسې سېسټم د HTML5 په چلولو کې ستونزه لري.
شنونکي: سیاسي او اییني بحران د بیړني حالت خطر پیدا کوي
دا له هغه وروسته ده چې تېره اونۍ د پاکستان سپريم کورټ د ټاکنو کمېشن ته حکم کړی وو چې په پنجاب کې دې د مې پر څوارلسمه انتخابات وکړي.
همداراز حکومت ته ويل شوي وو چې د دې ټاکنو لپاره دې د اپريل تر لسمې د انتخاباتو کمېشن ته پیسې ورکړي. د پاکستاني رسنيوو تر مخه، دا خوا او شا ۲۱ اربه روپۍ کيږي.
تر دې مخکې په دې اړه قامي اسمبلۍ د يو قراداد له لارې د سپريم کورټ پرېکړه د حکومت او ټاکنو کمېشن په کار کې مداخله بللې او رد کړې وه.
د پاکستان انتخاباتي کمېشن د مارچ پر ۲۹مه اعلان کړی وو چې د خیبر پښتونخوا اسمبلۍ ټاکنې به د اکتوبر پر اتمه نېټه کېږي.
د پاکستان ايتلافي حکومت او د انتخاباتو کمېشن ژر ټاکنې نه کولې او ويل یې چې په ټول ملک کې دې انتخابات دې په يو ځای، پر خپل قانوني وخت، د اکتوبر په مياشت کې وشي.
خو تحريک انصاف چې په پنجاب او خیبر پښتونخوا کې یې اسمبليانې تحليل کړې وې، ژر انتخابات غوښتل.
چيف جسټس عطا بنديال له خپلې خوا د دې مسلې نوټس اخیستی وو او د مقدمې اورېدنې لپاره یې يوه پنځه کسیزه کمېټې جوړه کړې وه.
په پينځو ججانو کې درې ججانو د ټاکنو ژر کولو په ملاتړ او دوو یې په مخالف کې رايه ورکړه. د پاکستان ایتلافي حکومت دا فیصله نه منله.
حکومت پر چيف جسټس عطا بنديال تور پورې کړی چې د تحريک انصاف د مشر او پخواني وزيراعظم، عمران خان ملاتړ کوي او په وينا یې چې پرېکړې یې د هغه د خواهشاتو مطابق دي.
حکومت د چيف جسټس د استعفا غوښتنه کړې ده. چيف جسټس عطا بنديال په دې اړه څه نه دې ويلي او تحريک انصاف واييچې حکومت د بې ځايه الزامونو په لګولو سره له انتخاباتو تښتي.