په افغانستان کې د ملګروملتونو مرستندوی ماموریت يا یوناما د طالبانو له خوا د یو شمېر مدني فعالانو پر حراست اندېښنه ښوولې ده.
يوناما د اپرېل پر ۱۰مه د د ښځو د حقونو يوې فعالې نرګس سادات او د پوهنتون د ښوونکي ذکریا اصولي له خوشې کېدو وروسته پر خپله رسمي ټويټر پاڼه د دې اقدام "هرکلی" کړی خو په عين حال کې يې د نورو بندي افغانانو د "ژر تر ژره خوشې" کېدو غوښتنه کړې ده.
یوناما ویلي، باید هېڅ افغان د بيان د ازادۍ څرګندولو له امله ونه نیول شي.
پر افغانستان د طالبانو له بیا واکمنېدو وروسته یو شمېر مدني فعالان، د پوهنتونونو استادان او خبریالان نیول شوي دي.
د راپورونو له مخې مطیع الله ویسا، نورايل کليوال، سبحان الله سبحاني، مرتضا بهبودي، خیرالله پرهر، کاظم امیني او الهه دلاورزۍ په ګډون لا هم يوشمېر مدني فعالان د طالبانو په حراست کې دي.
د طالبانو حکومت د یوناما د دې غوښتنې په اړه تر اوسه څه نه دي ویلي، خو تر دې وړاندې يې د ځينو فعالانو تر نيول کېدو وروسته ويلي ول چې له هغوی پوښتنې ګروېږنې کوي.