د کوټې پولیس وايي چې "نامعلومه" وسلوالو د بلوچستان د پخواني اعلاوزیر او صوبايي اسمبلۍ اوسني غړي نواب اسلم رييساني يو شخصي ساتونکی وژلی دی.
چارواکي وايي، پر موټرسايکل سپرو دوو ناڅرګنده وسلوالو د اپرېل ۱۹مې پر ماخوستن پر رییساني سړک پر ۵۴ کلن حاجي بولان مېنګل هغه مهال برید وکړ چې کله هغه تر تراوېح کولو وروسته د نواب اسلم رييساني کور ته روان وو.
بریدګر په تېښته کې بریالي شوي دي او تر دې دمه چا د بريد ذمه واري نه ده منلې.
د سرياب تاڼېدار احسان الله مروت ويلي چې له لومړنیو پلټنو ښکاري چې هغه یو هدفي برید وو ځکه چې په وینا یې، بولان مېنګل له هېچا سره دښمني نه لرله. نوموړی له ۳۴ کلونو راهيسې د نواب اسلم رييساني شخصي ساتونکی وو.
د نواب رييساني او د بلوڅو د رند قبيلې ترمینځ له کلونو راهيسې قبايلي دښمني هم ده چې پکې دواړه غاړو ته يوشمېر کسان وژل شوي.
په هغه دښمنۍ کې د نواب رييساني پلار او د بلوچستان پخوانی ګورنر نواب غوث بخش رييساني او ورور اسماعيل رييساني هم وژل شوي دي.