د افغانستان لپاره د ملګرو ملتونو د بشري حقونو ځانګړي راپور ورکوونکي له طالبانو د هغو کسانو د خوشې کولو غوښتنه کړې چې د ده په خبره، په خپل سر یې بندیان کړي دي.
رېچرډ بېنېټ دا غوښتنه د اپرېل پر ۲۰مه پر خپله رسمي ټوېټر پاڼه تر هغې وروسته کړې چې په افغانستان کې د طالبانو حکومت د کوچني اختر په مناسبت له زندانونو څخه د ۲،۴۶۰ بنديانو د خوشې کېدو او د ۴۸۱ نورو د قید د مودې کمولو اعلان وکړ.
Noting reported release of 2460 prisoners & sentence reduction of 481 others on #EidAlFitr by the #Taliban authorities, I urge the Taliban to release individuals who have arbitrarily been detained so they can celebrate Eid with their families. #FreeMortaza #freematiullahwesa
— UN Special Rapporteur Richard Bennett (@SR_Afghanistan) April 20, 2023
بېنېټ زياته کړې چې طالبان دې د تعليم مبارز مطیع الله ویسا او خبريال مرتضا بهبودي په څېر کسان هم خوشې کړي چې هغوی له خپلو کورنيو سره يو ځای اختر ولمانځي.
طالبانو د ۲۰۲۱ز کال په اګست کې پر افغانستان له واکمنېدو راهیسې يوشمېر مدني فعالان، خبريالان او ښوونکي نيولي چې ځينې يې خوشې کړي او ځينې لا هم د طالبانو په توقيف کې دي.
طالبانو ويلي، هغه کسان یې د پلټنو لپاره نیولي دي.