نوی کتاب: طالبان په چارټر الوتکو کې پاکستان ته د ملاقاتونو لپاره تلل

پر افغانستان د طالبانو د واکمنېدو په اړه په یو نوي کتاب کې راغلي چې د طالبانو وزیرانو د مهمو پرېکړو لپاره په ځانګړو چارټر الوتکو کې پاکستان ته سفر کاوه او هلته یې له چارواکو سره مشورې کولې. د امریکا د دفاعي چارو ملي پوهنتون استاد او د کتاب لیکوال حسن عباس وايي، د طالبانو د حکومت د بهرنیو چارو وزیر امیر خان متقي یوشمېر ځلې په پاکستان کې د پخواني پوځ له مشر جنرال قمر جاوېد باجوه سره لیدلي او د هغه تر اجازې وروسته یې هندیو ډېپلوماټانو ته په افغانستان کې د کار اجازه ورکړه. د طالبانو حکومت او پوځ لا په کتاب کې د څرګندونو په غبرګون کې څه نه دي ویلي. له عباس سره د امریکا غږ خبریالې شهناز نفیس مرکه کړې او په پیل کې یې ورڅخه د طالبانو او د پاکستان پوځي چارواکو د لیدنو په اړه پوښتلي دي.