د سیند صوبې په ۲۴ ضلعو کې د ضمني بلدیاتي انتخاباتو بهیر تر بشپړېدو وروسته د رایو شمېر روان دی.
د پاکستان انتخاباتي کمېشن په وینا، انتخاباتي بهیر د مې پر اوومه سهار اته بجې پیل شو چې بې له ځنډه د مازیګر تر پینځو پورې روان وو.
په انتخاباتو کې د کراچۍ اووه ضلعو په ګډون خلکو د جیکب اباد، شکارپور، سکر، نوشهرو فېروز او د شهید بېنظیر اباد په ګډون په ۲۴ ضلعو ووټونه واچول.
انتخاباتي کمېشن د مې پر اوومه په بیان کې ویلي دي چې په ځینو ځایونو کې "وړې لانجې" پیدا شوې چې هغه یې هوارې کړې او د رایې کارونې بهیر بې له ځنډه روان وو.
کمېشن وايي، انتخابات د ۶۳ خالي څوکیو ډکولو لپاره وشول چې د هغې لپاره د ۴۳۴ نوماندانو ترمینځ مقابله وشوه.
د کمېشن په وینا، په هغو ضلعو کې د رجسټر شویو ووټرانو شمېر څه د پاسه ۶۹۰،۰۰۰ دی.
د سیند په حیدراباد او کراچۍ ډېوېژنونو کې بلدیاتي ټاکنې د سږ کال جنورۍ پر ۱۵مه شوی وې. تر دې مخکې د جون پر ۲۶مه په لومړي پړاو کې د سکر، لاړکانه، شهيد بېنظيراباد او ميرپور خاص ډېوېژنونو په ۱۴ ضلعو کې بلدياتي انتخابات شوي ول.