امريکايي سېنېټر لينډسې ګراهم د روسیې له خوا د مطلوبو کسانو په نوملړ کې شاملېدل اعزاز ګڼلی او واييد اوکراين له ملاتړه به لاس وانخلي.
ګراهم د مې پر ۲۹مه پر ټويټر ليکلي چې د روسیې ولسمشر ولادیمیر پوتين حکومت له درغليو ډک دی او د هغه حکومت له خوا د نوموړي د ګرفتارۍ غوښتنه يو اعزاز دی. هغه ويلي چې له پوتين سره په هاګ کې د جرمونو د څېړلو نړیوال عدالت ته هم تللی شي.
Finally, here’s an offer to my Russian ‘friends’ who want to arrest and try me for calling out the Putin regime as being war criminals: I will submit to jurisdiction of the International Criminal Court if you do. Come and make your best case. See you in The Hague!
— Lindsey Graham (@LindseyGrahamSC) May 29, 2023
روسيو رسنیو د مې پر ۲۸ مه خبر ورکړ چې د هغه هېواد د کورنیو چارو وزارت د امریکايي سېنېټر لینډسې ګراهم نوم د مطلوبو کسانو په لېسټ کې شامل کړی دی. دا تر هغه وروسته ده چې سېنېټر ګراهم د مې پر ۲۶ مه د اوکرایني ولسمشر په دفتر کې له ولسمشر وولودیمير زېلېنسکي سره لیدلي وو او د دغې لیدنې ویډیو خپره شوې وه.
د دې ویډیو په اېډیټ شوې بڼه کې ښکاري چې سېنېټر ګراهم زېلېنسکي ته وايي چې د اوکراين په جګړه کې "روسان مري"، او بیا زياتوي چې "د امریکايي ملاتړ پېسې تر بل هر ځای په ښه توګه لګېدلې دي."
د روسيې له خوا له نیوکو وروسته اوکراین د دې ملاقات بشپړه ویډیو خپره کړه چې پکې ښکاري چې دا دواړه جملې له یو بل سره تړاو نه لري.
روسيې د تېر کال په فبرورۍ کې پر اوکراين یرغل کړی دی. امريکا او نور غربي هېوادونه په دې جګړه کې د اوکراين پوځي او مالي مرسته کوي.