د امازون په ځنګلونو کې د یوې الوتکې تر غورځېدو ۴۰ ورځې وروسته څلور ماشومان ژوندي موندل شوي دي.
ماشومان د کولمبیا سرتېرو ژغورلي دي. دوی د الوتکې د غورځېدو په پېښه کې ژوندي پاتې کسان دي. په هغه پېښه کې درې کسان وژل شوي ول.
د ماشومانو د ژغورنې اعلان د جون پر نهمه وشو او هغو باراني ځنګلونو کې د ماشومانو تر موندنې وروسته د پلټنو کار په خوشالۍ پای ته ورسید.
هغو ماشومانو ټولې ورځې په ځنګل کې تېرې کړې دي.
پېښه د کولمبیا خلکو له نږدې تعقیبوله او په اړه یې هیلې د ورځو په تېرېدو سره په کمېدو وې.
ولسمشر ګوستاو پیترو وویل، تمه لري چې نن (د جون پر ۱۰مه) له هغو ماشومانو سره خبرې وکړي.
چارواکو وویل چې ماشومان د معاینې لپاره د بوګوټا روغتون ته وړل شوي دي.
د امازون ځنګلونه په جنوبي امریکا کې دي او د برازیل، پیرو، کولمبیا او وینزویلا په ګډون نهو هیوادونو کې خواره دي.