چارواکي او کانکیندونکي وایي، د سيند او بلوچستان صوبو د سکرو په دوه کانونو کې د لاندې شویو څلورو کارکوونکو د ژغورنې هڅې دوام لري.
د سیند د جامشورو د کان کارکوونکو د جون پر ۱۳مه مشال راډيو ته وويل چې د جون پر ۱۱مه د کان نړېدو په پېښه کې دوه مزدوران لاندې شوي چې د ایستلو هڅه یې کوي.
هغوی وویل لاندې شوي دواړه مزدوران وروڼه او د کورمې د پاړه چینار اوسېدونکي دي.
د جامشورو ډېپټي کمېشنر فريدالدين مصطفا او د سيند صوبې د توانايي وزير امتياز شېخ د جون پر ۱۳مه مشال راډيو ته وويل چې د مرستندويه ادارو کارکوونکو له نړېدلي کان څخه د مزدورانو د ايستلو کار پيل کړی دی.
خو کانکیندونکي د حکومت ادعا ردوي او وايي چې تر اوسه هېڅ حکومتي ډله د عملياتو لپاره نه ده ورغلې او هغوی خپله د ژغورنې چارو ته دوام ورکړی دی.
اخوا د بلوچستان په پښتون مېشته سیمه دوکۍ کې د مې په څلورمه نېټه د کویلي په کان کې د لاندې شویو کانکیندونکو د ژغورنې کار د جون پر ۱۳مه پر ۴۰مه ورځ هم دوام درلود.
په پاکستان کې د سکرو کانونو د اتحادیې مشران وايي چې هلته د کارکوونکو د خوندیتوب لپاره مناسب اقدامات نه کېږي.
د هغوی په وينا، يوازې په ۲۰۲۲ز کال په پاکستان کې د سکرو په کانونو کې په بېلابېلو پېښو کې لږترلږه ۲۸۸ مزدوران وژل شوي دي.
د بلوچستان، سيند او خيبر پښتونخوا په زياتره کانونو کې پښتانه مزدوران کار کوي چې اکثريت يې د سوات او شانګلې دي.