نړیوال بانک افغانستان د هغو ۱۱ هېوادونو په ډله کې یاد کړی دی چې د ښځینه سوداګرو لپاره مناسب شرایط نه لري.
یاد بانک د جون پر ۱۹مه په خپاره کړي رپورټ کې افغانستان داسې هېواد بللی چې ورځ تر بلې پکې د ښځو لپاره د کاروبار او سوداګرۍ اړونده شرایط او قانوني حالت خرابېږي.
هغه رپورټ په ۲۰۲۳ز کال کې د نړۍ د ښځو لخوا د کېدونکو کاروبارونو او په دې اړه د جوړ شویو قوانینو اړوند دی.
په رپورټ کې د طالبانو د حکومت له خوا پر افغان نجونو او ښځو لګېدلو بندیزونو یادونه شوې او پکې راغلي چې طالبانو داسې لارښوونې او حکمونه کړي دي چې د ښځو د سفر ازادي او د دندو په موندلو کې د هغوی وړتیاوې محدودوي.
طالبانو تراوسه د دې رپورټ په اړه غبرګون نه دی ښودلی خو تر دې مخکې یې ویلي چې د ښځو پر تعلیم او کار یې بندیز د هغه هېواد کورنۍ موضوع ده او دا بندیزونه یې د شریعت له چوکاټ سره سم لګولی دی.