د پاکستان او روسیې چارواکي د جون پر ۲۰مه په اسلام اباد کې پر دوه اړخيزو چارو خبرې کوي.
د پاکستان د بهرنيو چارو وزارت د جون پر ۱۹مه په يوه خبرپاڼه کې ویلي چې د روسیې د بهرنيو چارو مرستيال وزیر اندرې رودينکوف په مشرۍ پلاوي سره دا مذاکرات د اسلام اباد او مسکو تر منځ د سلا مشورو پينځمه مرحله ده.
د خبرپاڼې تر مخه د خبرو په وخت به د اقتصادي، تجارتي او امنيتي مسايلو په اړه تفصيلي بحثونه وشي.
د يادونې ده چې پاکستان په دې وروستيو کې له روسيې څخه خام تېل اخیستي او د سوداګرۍ زياتولو ځيني تړونونه یې کړي دي.