د خیبر پښتونخوا د بنو چارواکي وايي، د جون پر ۲۷مه د بنو د یوې مدرسې چت پرېوتو په پېښه کې درې زده کوونکي وژل شوي او دوه نور ټپي شوي دي.
د ژغورنې ادارې ریسکیو ۱۱۲۲ یو چارواکي وقار خان مشال راډیو ته وویل چې د بنو له کاشو پله سره نیږدې د دې مدرسې ودانۍ کچه وه او تر باران وروسته وغورځېده.
نوموړي زیاته کړه چې د چت تر ملبې لاندې ګیر کسان یې را ایستلي دي.
د جون پر ۲۵ هم د بونير په تخته بند سيمه کې د تیز باران له وجې يوه ښځه وژل شوې او شپږ کسان ژوبل شوي وو. دا راز د مردان په ګړۍ کپوره کې د کور چت د پرېوتو له کبله یوه ښځه او شپږ کلن زوی يې ژوبل شوي وو.
هلته په پنجاب صوبه کې د هند پولې ته څېرمه په ناروال ضلع کې د جون پر ۲۴مه د تندر پرېوتو په دوه جلا جلا پېښو کې د یوې ښځې په ګډون پينځه کسان وژل شوي او څلور نور ژوبل شوي وو.