د پاکستان وزيراعظم شهباز شريف د هندي وزيراعظم نريندرا مودي په بلنه د شانګهای همکارۍ سازمان د غړو هېوادونو د مشرانو شورا په انلاین غونډه کې ګډون کوي.
د پاکستان بهرنيو چارو وزارت د جون پر ۳۰ مه په خپاره کړي بيان کې وویل چې هندي وزيراعظم د شورا د موجوده مشر په حيث د پاکستان وزيراعظم ته په ياده غونډه کې د ګډون بلنه ورکړې.
هغه غونډه د جولایي پر څلورمه د انټرنیټ له لارې کېږي.
بيان زياتوي چې په سرمشريزه کې د وزيراعظم شهباز شريف ګډون ثابتوي چې پاکستان د سيمې د امنيت لپاره د شانګهای همکارۍ سازمان مهم بولي.
تر دې مخکې د پاکستان بهرنيو چارو وزير بلاول بوټو زرداري د مې پر څلورمه د شانګهای همکارۍسازمان د بهرنیو چارو وزیرانو په دوه ورځنۍ غونډه کې د ګډون لپاره د هند ګووا ښار ته تللی وو.
دا په تېرو ۱۲ کلونو کې هند ته د پاکستان د بهرنیو چارو وزیر لومړی سفر وو.
پاکستان او هند چې اکثره يې اړيکې ترينګلي وي، د کشمير پر سر يې څو وارې له يو بل سره جنګونه هم کړي دي.
دا هم وګورئ:
هند، روسیې او پاکستان د ټولشموله افغان حکومت غوښتنه وکړهپاکستان وایي، روسیه ورسره د انرژۍ په برخه کې د همکاریو پر زیاتولو سلا شوېبلاول بوټو زرداري د شانګهای همکارۍ سازمان غونډې لپاره هند ته تللی دیشانګهای همکارۍ سازمان په ۲۰۰۱ز کال کې جوړ شو چې اته غړي لري. چين، روسیه، قرغيزستان، قازقستان، تاجکستان او ازبکستان د هغه سازمان باني غړي دي خو پاکستان او هند یې په ۲۰۱۷ز کال کې غړيتوب تر لاسه کړ.
ایران او افغانستان دا مهال د هغه سازمان څارونکي غړي دي خو د روسیې د بهرنیو چارو وزیر سرګي لاوروف وایي ایران به زر د هغه سازمان دایمي غړی شي.
لارووف د جون پر ۳۰ مه وویل، د ایران د غړیتوب سند به د نهې پر ورځ (د جولای پر څلورمه) د ټولو غړو له لورې لاسلیک شي.
شانګهای سازمان د سیمې د سياست، امنيت او اقتصاد په برخو کې د کار ترڅنګ د ترهګرۍ سره د مبارزې، د سرحدونو امنیت، او د نشه یي توکو د قاچاق سره د مبارزې په څیر مسلو باندې کار کوي.
د شانګهای همکارۍ سازمان د کلنۍ سرمشریزې په ګډون نورې غونډې لري، چې د غړو هېوادونو مشران د بېلابېلو سیمه ایزو او نړیوالو مسلو په اړه بحث او پریکړې کولو لپاره راټولیږي.
سازمان د منځنۍ او جنوبي اسیا هېوادونو ترمینځ د همکارۍ او خبرو اترو د پیاوړتیا لپاره د پلیټ فارم په توګه کار کوي.