بلوچستان نېشنل ګوند (مېنګل ډلې) د خضدار ضلعې د ناامنه وضعيت په اړه د جولای پر درېیمه نورو صوبو ته تلونکې د صوبې لويې لارې د احتجاج په توګه تړلې دي.
د ګوند د کوټې مشر غلام نبي مري مشال رېډیو ته وویل، احتجاج یې ځکه کړی چې د بلوچستان په وډه سیمه کې د ګوند مشر اخترجان مېنګل پر ضد "سازش" روان دی او د هغه د "سیاسي رول خرابولو" هڅې کېږي.
وډه د اختر مېنګل پلرنۍ کلی دی چې هلته يې له کلونو راهيسې د خپلې قبیلې له يو بل مهم کس شفيق مېنګل سره شخړه روانه ده. دواړو ډلو تور پورې کړی چې د يو بل کسان يې تښتولي دي.
شفيق مېنګل د ناقانونه بلوچ مسلح دفاع پخوانی مشر وو او دا مهال هم سياسي هلې ځلې کوي. پخوا پر شفيق مېنګل دا تور وو چې هغه په خضدار او شاوخوا سيمو کې د بلوڅ بېلتونپالو ډلو پرضد وسله وال فعاليتونه کول. دی د پاکستان د پخواني پوځي امر جنرال مشرف په کابينه کې شامل د وفاقي وزير نصير مېنګل زوی دی.
شفيق مېنګل اوس د جهالاوان عوامي پېنل په نوم ډله لري. د دې ډلې مرکزي غړي ندیم الرحمان بلوڅ مشال راډیو ته وویل، د بلوچستان سرداري نظام په ژرنده کې عام وګړي دل کېږي. هغه د اختر مېنګل پر ګوند تور پورې کړ چې د جهالاوان ډلې پر ضد یې خلک پارولي ترڅو په ټولټاکنو کې د هغه په وینا د جهالوان ډلې مخه ونیسي.
هغه زیاته کړه چې په وډه سیمه کې حالات کړکېچن دي او د خپلو ځانونو ساتنې لپاره مورچو ته ختلي دي.
پہیہ جام ہڑتال *وڈھ کے بگڑتے سنگین حالات پر بلوچستان نیشنل پارٹی مرکزی کال پر کوئٹہ کے مختلف مقامات سے قومی شاہراہ بند پارٹی کے رہنما و کارکناں کی ایک بڑی تعداد روڈ پر موجود*@sakhtarmengal pic.twitter.com/RE8EIilYI8
— Qasim Aziz Mengal (@MQasimMengal1) July 3, 2023
خو د بلوچستان نېشنل ګوند یو بل مرکزي غړي ملک مجید کاکړ مشال رېډیو ته وویل چې اوس په هیواد کې د ټولټاکنو وخت نېږدې شوی، نو د ده په تور اېسټيبلېشمنټ غواړي چې اختر مېنګل د ټاکنو په مهال په قبایلي جګړه کې ښکېل وساتي او ووټونه یې کم کړي.
په وډه کې د روانې شخړې ضد بلوچستان عوامي ګوند نن (جولای درېيمه) د بلوڅ مېشتو سيمو ټولې مهمې لارې تړلې وې. دوی د خضدار، مستونګ، تربت، پنجګور، کوټې او نورو سيمو سړکونه د هرډول ټريفک پر مخ تړلې دي.
د اختر مېنګل او شفيق مسنګل ترمیڼخ د شخړی د هواري لپاره مذهبي او ځایي قبایلي له دواړو غاړو سره لېدلي خو هڅو يې لا نتیجه نه ده ورکړې.
په تېرو ورځو کې د شخړې د هوارولو لپاره د بلوچستان د کورنیو چارو وزیر میر ضیا لانګو او د حکومتي غړو کمیټۍ سیمې ته تللې وه. لانګو هغه مهال خبري غونډې ته وویل چې د دواړو خواو ترمینځ اوسمهال د جګړې خطر نشته او په دې اړه ورته دواړو خواوو باور ورکړی دی.
د بلوچستان حکومت ویاندې فرح عظیم شاه مشال راډیو ته په استولي پیغام کې ویلي چې دا د مېنګل قبایلو شخړه ده او صوبایي حکومت پکې ځان فریق نه جوړوي خو د شخړې د هوارولو لپاره هڅې کوي.