د اسلام اباد سیشن جج په توشه خانه قضیه کې د پاکستان تحریک انصاف مشر او پخواني وزیراعظم عمران خان ته د درو کالو د قید او د یو لاک روپیو جرمانې سزا اورولې ده.
دا پرېکړه د اسلام اباد ضلعي او سیشن عدالت جج همایون دلاور د اګست پر پنځمه اورولې ده. عدالت د بند او جرمانې تر څنګ عمران خان تر راتلونکو پنځو کالو د هر ډول ولسي څوکۍ لپاره نااهله ګرځولی دی.
پولیسو د عدالت تر پرېکړه سم دستي وروسته عمران خان په لاهور کې له خپله کوره ونیوی. لومړی داسې رپورټونه وو چې نوموړی به د کوټ لکپت جېل ته وړي خو وروسته یې د موټروې له لارې اسلام اباد ته منتقل کړ.
ټاکل شوې چې هغه به د راولپنډۍ زندان ته تر انتقالولو وړاندې د صحي معاینې لپاره د اسلام اباد پیمز روغتون ته وښودل شي.
په عین حال کې د پاکستان تحریک انصاف د کور کمېټۍ غونډه د یاد ګوند د مرستیال مشر شاه محمود قرېشي په مشرۍ کې شوې او د خپل مشر عمران خان د نیول کېدو او راتلونکي تګلارې جاج یې اخیستی دی.
تحریک انصاف پر خپله ایکس پاڼه د یادې غونډې په خپره کړې اعلامیه کې د عدالت دا پرېکړه پر تعصب ولاړه بللې ده.
په اعلامیه کې راغلي چې د تحریک انصاف مشر او پخوانی وزیراعظم عمران خان "د یو متعصبانه او ناقصه عدالتي پرېکړې په نتیجه کې نیول شوی دی."
د تحریک انصاف کور کمېټۍ د پاکستان له سپریم کورټ څخه خواست کړې چې د دوی د نظرثانۍ پر درخواست دې بې له څه ځنډه اورېدنه پیل کړي.
بل پلو د تحریک انصاف د قانون پوهانو ډلې هم په دې اړه خپله غونډه او سلامشوره کړې ده. دوی اعلان کړی چې د اسلام اباد سیشن جج دا پرېکړه به په لوړو عدالتونو کې چېلنجوي.
د تحریک انصاف کور کمېټۍ په خپله اعلامیه کې ویلي چې د خپل مشر عمران خان پر هغه لارښوونه به عمل کوي په کوم کې چې نوموړي نن پر خپله اېکس پاڼه په يو ويډيو پيغام کې پر خپلو پلويانو د پرامنه احتجاج غږ کړی وو.
نوموړي دا پيغام تر ګرفتارۍ مخکې ريکارډ کړی وو او ويلي يې وه چې کله دا پيغام خپرېږي نو هغه وخت به ګرفتار شوی وي.
ستاسې سېسټم د HTML5 په چلولو کې ستونزه لري.
د پاکستان پخوانی وزيراعظم عمران خان د درغلۍ په قضيه کې ګرفتار شو
تر دې وړاندې د یاد ګوند د خیبر پښتونخوا صوبايي مخکښ او پخواني صوبايي وزیر شوکت یوسفزي مشال راډیو ته وویل چې عمران خان نیول شوی دی، هغه ته د درو کالو د بند سزا ورکړل شوې، یو لاک روپۍ جرمانه شوی او تر پنځو کالو نااهله ګرځول شوی دی.
شوکت یوسفزي وویل، "کوم جج چې عمران خان ته سزا اورولې ده، د هغه د باور وړ نه دی."
نوموړي زیاته کړه چې دا مقدمه به های کورټ او سپریم کورټ ته ځي او د ده په فکر، کېدای شي په ورځ او دوو کې دا مقدمه ختمه کړي.
د حکومت دریځ څه دی؟
د اطلاعاتو وفاقي وزیرې مریم اورنګزیب د اګست پر پنځمه په اسلام اباد کې د خبري غونډې پر مهال ویلي چې په توشه خانه کېس کې عمران خان ته د خپل سپیناوي پوره موقع ورکړل شوې وه او حکومت د ریاستي طاقت استعمال نه دی کړی.
تر دې وړاندې د ۲۰۲۳م کال په جولای کې د اسلام اباد سترې محکمې د پخواني وزیر اعظم عمران خان پرضد د توشه خانې دوسیه خارجه کړې وه.
په توشه خانه مقدمه کې څه وو؟
د عمران خان خلاف د توشه خانې مقدمه د پاکستان اېتلافي حکومت د ۲۰۲۲ز کال په اګست کې په انتخاباتي کمېشن کې دایره کړې وه.
په دې مقدمه کې پر پخواني وزیراعظم تور پورې شوی وو چې د خپلو شتمنیو تفصیل ورکولو پر مهال یې د هغو ډالیو او پیسو ذکر نه دی کړی چې د خپلې واکمنۍ پر مهال یې له توشه خانې اخیستي او یا یې د هغو ډالیو د خرڅلاو له لارې ترلاسه کړې دي.
دا هم وګورئ:
اسلام اباد های کورټ د عمران خان خلاف د توشه خانې مقدمه خارجه کړهعدالت د عمران خان مېرمن ته د توشه خانې قضیه کې حفاظتي ضمانت ورکړی د تحريک انصاف په لسګونو غړي نيول شوي، مظاهره چيانو حکومتي، پوځي او شخصي املاکو ته زیان اړولید پاکستان انتخاباتي کمېشن د ۲۰۲۲ز کال د اکتوبر پر ۲۱مه نېټه د توشه خانې په نوم په قضیه کې د شتمنیو په اړه د "ناسمو معلوماتو" ورکولو په سر عمران خان د قامي اسمبلۍ له څوکۍ نااهله کړی وو.
یاد کمېشن د نوموړي پرضد د پوځداري قانون له مخې د کارروايۍ کولو مقدمه عدالت ته استولې وه.
عمران خان کمېشن ته په ځواب کې ویلي ول چې ورباندې پورې شوي تورونه "بې بنسټه" دي او د "سیاسي غچ" اخیستو لپاره "په بدنیتۍ" ولاړ دي.
په پاکستان کې توشه خانه هغه ځای ته وايي چې پکې د هېواد مشران، د پارلېمان غړي، بیوروکراټان او نور لوړپوړي چارواکي د بهرنیو سفرونو پر مهال ترلاسه کړې ډالۍ ږدي.
د توشه خانې له اصولو او قواعدو سره سم، هغه چارواکي چې ډالۍ ترلاسه کوي، باید د کابینې ډېوېژن له ټولو جزییاتو (تفصیلاتو) خبر کړي.