نن (د اګست پر اتمه) په کوټه کې د هغو ۵۴ وکيلانو د وژنې د اووم تلين لمانځل کېږي چې په ۲۰۱۶ز کال کې وژل شوي ول.
د بلوچستان د وکيلانو اتحادیې لخوا نن (د اګست پر اتمه) رسنيو ته په لېږل شويو معلوماتو کې ويل شوي چې په دې اړه غونډو کې به د وژل شويو وکيلانو د کار ستاينه او د هغوی د ژوند په اړه خبرې کېږي.
د ۲۰۱۶ز کال د اګست پر اتمه د کوټې په سيول هسپتال کې د بلوچستان وکيلان په نښه شول چې پکې د ۵۴ وکيلانو او دوو خبريالانو په ګډون ۷۰ کسان ووژل شول. د هغه بريد ذمه واري داعش وسلوالې ډلې او له تحريک طالبان پاکستان څخه بېلې شوې جماعت الاحرار وسلوالې ډلې منلې وه.