د شام بشري حقونو د څار ډلې ویلي چې د هغه جګړه ځپلي هېواد په ختیځ کې د پوځ پر یوه بس په حمله کې د سوریې رژیم لږترلږه ۲۳ سرتېري وژل شوي دي.
هغه برتانیا مېشتې ډلې د اګست پر ۱۱مه وویل چې اسلامي دولت (داعش) وسلواله ډله د برید ذمه واره بلل شوې ده.
د بشري حقونو د څار ډلې په یوه بیان کې وویل چې د داعش وسلوالو د اګست پر ۱۰مه په دیرالزور سیمه کې د ځواکونو یو بس په نښه کړ چې پکې تر ۱۰ زیات سرتېري ژوبل شوي هم دي.
ډلې په شام کې د سرچینو له قوله ویلي چې په ژوبلو کې د یوشمېر سرتېرو روغتیايي حالت خراب دی او زیاتوي چې په لسګونو نور سرتېري ورک دي.
داعش ډلې او د شام حکومت لا د برید په اړه څه نه دي ویلي.
اسلامي دولت ډلې په ۲۰۱۳ز کال کې د شام او عراق په ځینو برخو کې فعالیتونه پیل کړل او یو کال وروسته یې د دواړو هېوادونو یوشمېر لوی ښارونه او سیمې ونیولې چې وروسته ورڅخه نړیوال اېتلاف خلاصې کړې.
هغه ډله په ۲۰۱۹ز کال کې په شام کې د وروستۍ سیمې د کنټرول پر بایللو سربېره د هغه هېواد په لویه بېدیا (دښته یا صحرا) کې پټنځایونه لري او ورڅخه بریدنه کوي.
داعش په وروستیو اوونیو کې د شام په شمال او شمال ختیځ کې بریدونه زیات کړي دي.