د خیبر پښتونخوا په کورمه کې پر یوه امنیتي پوسته په وسلوال برید کې دوه سرتېري وژل شوي او یو ژوبل دی.
د ضلعي پولیسو یو لوړپوړي چارواکي د نوم نه ښوولو په شرط مشال راډیو ته وویل چې پېښه د اګست پر ۱۴مه نیمه شپه په مزرینه سیمه کې شوې ده.
د ده په خبره، په حمله کې د ملېشې ځواک دوه سرتېري وژل شوي او درېیم ژوبل دی او وسلوال تر برید وروسته تښتېدلي چې لټون یې روان دی.
د کورمې د پولیسو مشر محمد عمران د مشال راډیو د پوښتنې په ځواب کې په وټس ایپ په یو پیغام کې پېښه تایید کړې خو نور څه یې نه دي ویلي.
د حملې ذمه واري لا چا نه ده منلې.
مزرینه د منځنۍ کورمې په عليشېرو کې ده چې پکې پوځ شپږ کاله مخکې د وسلوالو پرضد عملیات کړي ول.
په وروستیو میاشتو کې په کورمه کې د ناامنۍ یوشمېر پېښې شوې دي چې پکې د امنیتي سرتېرو په ګډون ولسي وګړو ته مرګژوبله اوښتې ده.