د سوات په سیدو شریف کې د سرکاري کارکوونکو د یوه استوګنځي دېوال پرېوتو په پېښه کې دوه ماشومان وژل شوي دي.
د سیدوشریف د پولیسو مشر عطا الله او د مرستندویه او ژغورنې چارو ادارې (۱۱۲۲) په جلا، جلا بیانونو کې ویلي دي چې د اګست پر ۱۵مه ناوخته په کالج کالونۍ کې سرکاري پارک ته نېږدې د یو پخواني کور دېوال پرېوت.
په بیانونو کې راغلي چې هغو ماشومانو له کور سره نېږدې لوبې کولې چې دېوال لاندې کړل. بیانونه زیاتوي چې د یو ماشوم عمر پینځه کاله او د بل اووه کاله وو.
د سیدو شریف اوسېدونکي او د بلدیاتي ادارې یو پخواني کونسلر عزیز الحق مشال راډیو ته وویل چې په بیا بیا یې ضلعي انتظامیې ته ویلي دي چې د سرکاري استوګنځایونو او د پارک دېوالونه خورا زاړه دي او هر وخت یې د پرېوتو امکان دی نو هغه دې ورغوي خو په وینا یې چې چارواکو غبرګون و نه ښود.
ضلعي انتظامیې لا د سیدو شریف د پېښې او هلته د استوګنځایونو حالت په اړه څه نه دي ویلي.