د امريکا د بهرنيو چارو وزير اينتني بلېنکن ويلي، په داسې حال کې چې پاکستان له خپل اساسي قانون سره سم "د ازادو او عادلانه انتخاباتو لپاره چمتووالی" نیسي، امريکا به د اقتصادي سوکالۍ لپاره ګډ هوډ ته ژمنه پاتې شي.
نوموړي دا خبره د اګست پر ۱۶مه پر اېکس (ټوېټر) انوار الحق کاکړ ته د پاکستان د لنډمهاله وزيراعظم په توګه تر ټاکل کېدو د مبارکۍ تر ورکولو سمدستي وروسته ليکلې ده.
Congratulations to new Pakistan Interim Prime Minister @anwaar_kakar. As Pakistan prepares for free and fair elections, in accordance with its constitution and the rights to freedom of speech and assembly, we will continue to advance our shared commitment to economic prosperity.
— Secretary Antony Blinken (@SecBlinken) August 16, 2023
په ځواب کې انوار الحق کاکړ پر خپله اېکس پاڼه ليکلي چې لنډمهالی حکومت به په پاکستان کې د اساسي قانون له مخې د ازادو او منصفانه انتخابانو د پروسې اسانولو لپاره جدي کار کوي.
نوموړي زياته کړې چې پاکستان له امریکا سره خپلې ملګرتیا ته ارزښت ورکوي او په سیمه کې د اقتصادي هوساینې، جمهوريت او ثبات لپاره ګډې ژمنتيا ته په درنه سترګه ګوري.
Thank you @SecBlinken. The interim government will be assiduously working to facilitate a free and fair election process in Pakistan according to the Constitution. We place importance on our partnership with the US and deeply value the shared commitment to economic prosperity,… https://t.co/6lSlmLvv19
— Anwaar ul Haq Kakar (@anwaar_kakar) August 16, 2023
انوار الحق کاکړ د اګست پر ۱۴مه د پاکستان د لنډمهاله وزيراعظم په توګه لوړه وکړه.
د پاکستان د ایین له مخې د قامي او صوبايي اسمبليانو تر ماتېدو وروسته بايد انتخاباتي کمېشن په درو میاشتو کې دننه انتخابات وکړي.
خو کمېشن ويلي چې د ۲۰۲۳ز کال له برېښنايي او کمپیوټري (ډېجیټل) سرشمېرنې سره سم، د نويو انتخاباتي حلقه بنديو جوړول له څلورو څخه تر شپږو مياشتو پورې وخت اخلي چې د شنونکو په باور، ښايي د ټاکنو د ځنډ باعث شي.
خو د پاکستان شاوخوا ټولو سیاسي ګوندونو له کمېشن او لنډمهالي حکومته غوښتي دي چې په سږني مني کې دې له ټاکلي وخت سره سم، راڼه او منصفانه انتخابات وکړي.