په پاکستان کې د لنډمهالي حکومت وفاقي کابینې ۱۶ وزیرانو د خپلو دندو لوړه کړې ده.
د پاکستان دولتي راډیو او دولتي ټېلېوېژن د اګست پر ۱۷مه وویل چې ولسمشر عارف علوي لندمهاله وزیرانو ته سوګند ورکړ.
په دې لړ کې په اسلام اباد کې د ولسمشر په ماڼۍ کې په غونډه کې د لنډمهالي وزیراعظم په ګډون یوشمېر لوړپوړو چارواکو ګډون وکړ.
د پاکستان دولتي رسنۍ وايي چې په کابینه کې پخوانی ډېپلوماټ جلیل عباس جېلانی، د دولتي بانک پخوانۍ مشره شمشاد اختر، د بلوچستان د کورنیو چارو پخوانی وزیر سرفراز بګټی، د سیاسي چارو شنونکی مرتضا سولنګی، ساینسپوه ډاکتر عمر سیف او نومیالی هنرمند جمال شاه هم شامل دي.
د پاکستان د ولسمشر د دفتر په فرمان، چې یو نقل یې مشال راډیو هم ترلاسه کړی، کې راغلي په کابینه کې ۱۶ وزیران شامل دي او پکې له ولسمشره د وزیراعظم د درو سلاکارانو د ګومارلو غوښتنه هم شوې ده.
دا تر هغې وروسته ده چې د اګست پر ۱۴مه انوار الحق کاکړ د لنډمهالي وزیراعظم په توګه د دندې لوړه وکړه.
د پاکستان پخواني وزیراعظم شهباز شریف او په قامي اسمبلۍ کې د مخالفه ډلو مشر راجا ریاض احمد د اګست پر ۱۲مه ۵۲ کلن کاکړ د وزیراعظمۍ څوکۍ ته نومولی وو.
انوار الحق کاکړ به د عامو انتخاباتو په نتیجه کې د نوې قامي اسمبلۍ تر جوړېدو پورې وزیراعظم وي.
د پاکستان ولسمشر عارف علوي دفتر د اګست پر نهمه قامي اسمبلي ړنګه کړه.
د قامي اسمبلۍ تر ماتېدو او د نګران حکومت تر جوړېدو وروسته کمېشن د انتخاباتو نېټه اعلانوي او په دې برخه کې تیارۍ پیلوي.
په پاکستان کې د قانون له مخې منتخب حکومت خپله پینځه کلنه موده تر پوره کولو وروسته واک نګران حکومت ته سپاري چې هغه بیا د ټاکنو له کمېشن سره په شریکه په ۹۰ ورځو کې انتخابات کوي او چارې نویو واکدارانو ته سپاري.