په پاکستان کې سوداګرو او جماعت اسلامي د ګرانۍ او د بجلۍ د زیاتو شویو بیو پر ضد د سېپټمبر پر دوېیمه په ټول ملک کې احتجاج اعلان کړی دی.
د سوداګرو او جماعت اسلامي مشرانو د سېپټمبر پر لومړۍ نېټه په پېښور کې تر خبري غونډې وروسته مشال راډیو ته وویل چې د خالي پر ورځ به په ټول ملک کې کاروبارونه تړلي وي.
د جماعت اسلامي د خیبر پښتونخوا مشر عبدالواسیع وویل، حکومت دې پر عام ولس د بوج اچولو پر ځای له سیاستوالو، عدلیې، لوړپوړو افسرانو او جنرالانو مراعات کم کړي.
دا په داسې حال کې ده چې له تېرو څو ورځو راهسې په پاکستان کې د ګرانۍ او د بجلۍ د زیاتو شویو بیلونو پرضد احتجاجونه روان دي.
په مینګوره کې د سېپټمبر پر دویمه ګڼ خلک د ګرانۍ خلاف احتجاج کوي.
د پاکستان نګران وزیراعظم انوارالحق کاکړ د اګست پر ۳۱مه په اسلام اباد کې رسنیو ته وویل، هڅه کوي چې د بجلۍ د ګرانۍ ستونزه په داسې توګه هواره کړي چې د پیسو له نړیوال صندوق سره له شوي تړونه سرغړونه ونه شي.
هغه وویل د تیلو د قیمتونو د زیاتوالي له امله برېښنا ګرانه شوې ده او په کابینه کې شامل مسلکي کسان د موجودو چیلنجونو سره د مقابلې لپاره پر غوره حل لاره کار کوي.
دا په داسې حال کې ده چې په پاکستان کې خلکو د بجلۍ په بیلونو کې د زیاتوالي په غبرګون کې پراخې مظاهرې پیل کړې دي.
د اګست پر ۳۱مه په کراچۍ کې د ماربلو کارخانو مالکانو د بجلۍ د زیاتو بلونو خلاف احتجاج وکړ. احتجاج کونکو ویل د بجلۍ بیلونه دوه او درې چنده د زیاتېدو له امله یې کاروبار متاثره شوی دی او مجبور دي چې یوازې اته ساعته کارخانې کار وکړي.
په پاکستان کې په دې وروستیو کلونو کې حکومت د برېښنا او تېلو پر سر ولس ته ورکوونکی رعایت په دوامداره توګه کم کړی دی او وايي چې دا کار د پیسو نړیوال صندوق د پور د شرطونو پوره کولو لپاره اړین دی.
دا هم وګورئ:
انوار الحق کاکړ: د بجلۍ بیلونو ستونزه د ای ایم ایف تړون په چوکاټ کې هوارووپاکستان کې تر پراخو مظاهرو وروسته حکومت د بجلۍ نرخونو په اړه له ای اېم اېف سره اړیکه نیسيپاکستان کې د بجلۍ په بلونو کې د زياتوالي پرضد احتجاجونه شويوزیراعظم له چارواکو څخه د بجلۍ بېلونو د کمښت پلان غوښتی دیپه وروستي ځل حکومت د ۲۰۲۳م کال په جولای مياشت کې د برېښنا بیو ته بیا کتنه وکړه او هغه یې لوړې کړې. د هم هغې میاشتې پر ۱۲مه ای اېم اېف پاکستان ته د درې اربه ډالرو نهه میاشتنی پروګرام تایید کړ.
د پاکستان پخواني وزیراعظم شهباز شریف هغه مهال ویلي ول چې د موافقې منظورېدل یې د هېواد د اقتصادي ثبات د هڅو په لړ کې يو لوی ګام دی.
پاکستان له ۲۰۱۹ز کال راهیسې له اقتصادي بحران سره مخامخ دی او په هم هغه کال یې د پیسو له نړیوال صندوق سره د شپږو اربو ډالرو د پور درې کلن تړون لاسلیک کړی وو.
اسلام اباد له اوږدې مودې راهیسې له ای اېم اېف څخه د پور د نهم قسط ترلاسه کولو هڅې کولې خو د ۲۰۲۲ز کال له نومبر راهیسې هغه پروګرام د ځنډ ښکار وو.
په دې ترڅ کې د پخواني وزیراعظم شهباز شريف ترڅنګ د پاکستان لوړپوړو چارواکو د ای اېم اېف له مشرانو سره یوشمېر ناستې وکړې او د پیسو د نړیوال صندوق د شرطونو پوره کولو لپاره يې ګامونه پورته کړل.
په دې اقداماتو کې د انرژۍ د بیو لوړول، د حکومتي لګښتونو کمولو لپاره د کفایت شعارۍ پروګرام او د ۲۰۲۳-۲۰۲۴ز مالي کال په بجټ کې د ۲۱۵ اربه روپيو نویو ټېکسونو لګول شامل دي.