د کرکټ په نړیوال کپ کې نن (د اکتوبر پر ۳۰مه) افغانستان له سري لنکا سره لوبه کوي.
ټاکل شوې چې دا لوبه د کابل پر یوه او د پېښور پر یوه نیمه بجه د هند په پونې ښار کې پیل شي.
سري لنکا او افغانستان دواړو تر اوسه په پینځه پینځه لوبو کې دوه دوه ګټلې دي خو سري لنکا د ښه رن رېټ(د منډو ورستي تناسب) له کبله تر افغانستان وړاندې ده.
تر دې وړاندې د اکتوبر پر ۲۹مه د هند لوبډلې انګلستان ته په ۱۰۰ منډو ماتې ورکړه.
په مجموعي توګه هند دا وخت پر لومړي نمبر دی چې کړې شپږ واړه لوبې يې ګټلې او ۱۲ پواينټه لري. پر دویم نمبر جنوبي افریقا او پر درېیم نیو زي لینډ دی.