د خیبر پښتونخوا په ټانک کې د پولیسو په ګاډي د وسلوالو په یو برید کې د تاڼیدار په ګډون درې پولیس سرتیري وژل شوي او پینځه نور ژوبل شوي دي.
د تحریک طالبان پاکستان ویاند محمد خراساني مشال راډیو ته په استولي بیان کې ویلي چې په ټانک کې پر پولیسو برید د هغوی وسلوالو کړی دی.
د روان ۲۰۲۳ز کال له اوړي راهیسې د خیبر پښتونخوا په یوشمېر برخو کې د ناامنۍ پېښې زیاتې شوي دي چې د ولسي خلکو په ګډون پکې امنیتي سرتېرو ته زیانونه اوښتي دي. د پاکستان حکومت او پوځ وايي، د وسلوالو پرضد یې هدفي عملیاتو ته دوام ورکړی دی.
د نومبر پر درېيمه په ډیره اسماعیل خان کې د پوليسو ګاډي ته نېږدې چاودنه شوې وه پکې پينځه عام وګړي ووژل شول او د دوو پوليسو په ګدون ۲۲ ژوبل شول. په هم هغه ورځ دویمې چاودنې یو تن وواژه او دوه نور یې ژوبل کړل.
د سېپټېمبر پر ۳۰مه په اسلام اباد کې د څېړنو او امنیتي مطالعاتو مرکز په خپل تازه رپورټ کې وویل چې د ۲۰۲۳ز کال په لومړیو نهو میاشتو کې په پاکستان کې امنیتي ځواکونو ته دومره مرګژوبله اوښتې ده چې په تېرو اتو کلونو کې یې ساری نه لیدل کېږي.