د پاکستان او روسیې کاري ډلو په شریکه غونډه کې د افغانستان او سیمې د امنیت پر موضوعاتو خبرې کړې دي.
د اکتوبر پر ۱۷مه د پاکستان د بهرنیو چارو وزرات په اعلامیه کې ویلي چې د دواړو هېوداونو د کاري ډلو ۱۰مه شریکه غونډه د جمعې پر ورځ په اسلام اباد کې وشوه او د روسیې د بهرنیو چارو مرستیال وزیر سیرګي ویرشینین او د هغه پاکستاني سیال سیدحیدر شاه پکې ګډون وکړ.
د بیان ترمخه دواړو خواوو په سیمه او نړۍ کې د تروریستي ګواښونو په اړه خبرې وکړې او په دې ترڅ کې یې د افغانستان، مینځنۍ او جنوبي اسیا او شمالي افریقا په اړه ځانګړی بحث وکړ.
په راپور کې راغلي چې اسلام اباد او ماسکو موافقه وکړه چې دواړه هېوادونه به د تروریزم د مالي سرچینو د وچولو او د ترهګرۍ ضد مبارزې په نورو برخو کې په خپلو کې همکاري کوي.
🔊: PR NO. 2️⃣1️⃣3️⃣/2️⃣0️⃣2️⃣3️⃣Tenth Meeting of the Pakistan-Russia Joint Working Group on Combating International Terrorism and Other Challenges to Security🔗⬇️ https://t.co/3ovPtBhMlA pic.twitter.com/AWTgpigUKf
— Spokesperson 🇵🇰 MoFA (@ForeignOfficePk) November 17, 2023
همدا راز دواړو لورو د افراطیت پر مختلفو بڼو، د ترهګریزو ایډیالوژیو د خپراوي او د تروریستي موخو لپاره د اطلاعاتو او مخابراتي ټیکنالوژۍ څخه د ناوړه استفادې په اړه هم خبرې وکړې.
بیان زیاته کړې چې دواړو هېوادونو د دې ننګونو سره د مبارزې لپاره د هراړخیز ستراتیژیو په اړتیا موافقه وکړه.
په تېرو دوو کلونو کې اسلام اباد او مسکو د اړيکو بهترولو لپاره کار زیات کړی دی. دواړو هېوادونو د سوداګرۍ، انرژۍ او پوځي همکاریو ژمنې او تړونونه کړي دي. د اکتوبر پر ۱۷مه د چین په پلازمینه بیجینګ کې د پاکستان لنډ مهالي وزیراعظم انوار الحق کاکړ د روسيې له ولسمشر ولادیمیر پوتین سره د افغانستان ترڅنګ پر سوداګرۍ خبرې کړی وې.
دا په داسې حال کې ده چې د پاکستان لنډ مهالي انوارالحق کاکړ څه موده مخکې ویلي ول چې په افغانستان کې د طالبانو له واکمنېدو وروسته په پاکستان کې په تروریستي حملو کې زیاتوالی راغلی.