په افغانستان کې د کډوالو لپاره د ملګرو ملتونو د ادارې (یو این ایچ سي ار) مشر لیونارډ زولو وايي چې دوی افغانستان ته تل د یوه بېړني حالت په سترګه ګوري.
لیونارډ زولو دا څرګندونې د دیسمبر پر څلورمه د بیلجیم په پلازمېنه برسلز کې کړې دي. د بلجیم د اي یو ابزرور په نامه خبري ویبپاڼې خبر ورکړی چې لیونارډ زولو د ۲۰۲۱زکال په اګست میاشت کې پر افغانستان د طالبانو واکمنېدو په اړه وویل چې " افغانستان لا هم له هغه بېړني حالته نه دی راوتلی."
د ملګرو ملتونو د کډوالو اداره اوس مهال له هغو افغان کډوالو سره د مرستې په بېړنۍ چارو بوخت ده چې د پاکستاني حکومت له خوا د نومبر له لومړۍ نېټې په زور خپل هیواد ته ستنول کېږي. د زولو تر خبرو مخکې د ملګرو ملتونو بېلابېلو چارواکو په افغانستان کې د خوړو کمي او غریبۍ زیاتېدو خبرداری ورکړی دی.