د پاکستان پيپلز ګوند مشر بلاول بوټو زرداري د عامو انتخاباتو لپاره د ګوند ۱۰ نکاتي منشور اعلان کړی دی.
نوموړي د ډېسېمبر پر ۲۷مه د خپلې مور او پخوانۍ وزيراعظمې بېنظير بوټو د ۱۶م تلين په مناسبت د سیند په ګړي خدا بخش کې يوې ولسي غونډې ته په وينا کې وويل چې ځينو قوتونو دا فکر کاوه چې د بېنظيرې په ليرې کولو به پيپلز ګوند ختم شي خو د هغه په وينا، پلويانو يې د "هر سخت وخت" مقابله وکړه.
د پاکستان پيپلز ګوند د رسنيو څانګې د ډېسېمبر پر ۲۷مه پر خپله رسمي اېکس پاڼه د نوموړي د وينا ځينې برخې خپرې کړې دي.
“پاکستان پیپلز پارٹی کے جیالے گڑھی خدا بخش میں جمع ہوکر پوری دنیا کو ایک ہی پیغام بھیجتے ہیں کہ زندہ ہے بی بی زندہ ہے۔16 سال قبل کچھ قوتوں نے سوچا کہ محترمہ بینظیر بھٹو کو شہید کرکے وہ پاکستان پیپلز پارٹی کو ختم کردیں گے، وہ غریب، مزدور، کسان، طلب علم اور نوجوانوں کی آواز کو… pic.twitter.com/DZpQq16gFF
— PPP (@MediaCellPPP) December 27, 2023
پر دې مهال بلاول بوټو زرداري وویل، "موږ ويلي ول چې جمهوريت غوره انتقام دی نو موږ هغه پوځي امر [جنرال پروېز مشرف] ليرې کړ او جمهوريت مو بحال کړ. موږ خپل انتقام د جمهوريت په صورت کې واخيست."
د پاکستان پخوانی پوځي واکمن جنرال پروېز مشرف لومړی په ۲۰۰۶ز کې د بلوچستان د پخواني اعلاوزیر او ګورنر نواب اکبر خان بګټي او تر هغې یو کال وروسته د پخوانۍ وزیراعظمې بېنظیر بوټو د وژنو په مقدمو کې هم ونومول شو، خو هغه دا تورونه رد کړل.
په ۲۰۰۸ز کال کې په پاکستان کې د عامو انتخابات په نتيجه کې چې کله د پیپلز ګوند په مشرۍ اېتلافي حکومت جوړ شو، نو پر مشرف يې فشار راوړ چې د ولسمشرۍ له دندې ګوښه شي خو هغه انکار وکړ. البته کله چې په پارلېمان کې د مشرف د مواخذې خبرې پیل شوې، نو هغه د ۲۰۰۸ز کال په اګست کې استعفا ورکړه، او بيا وروسته د پيپلز ګوند شريک مشر اصف علي زرداري د پاکستان ولسمشر وټاکل شو.
بېنظير بوټو د ۲۰۰۷ز کال د ډېسېمبر پر ۲۷مه د راولپېنډۍ په لیاقت باغ کې تر جلسې وروسته په یوه ځانمرګي برید او ډزو کې وژل شوې وه. تحريک طالبان پاکستان د هغې حملې ذمه واري منلې وه.
بلاول بوټو په خپله وينا کې دعوه وکړه چې يوازې پيپلز ګوند کولی شي چې هېواد وژغوري او د ولس ستونزي هوارې کړي.
نوموړي وویل چې په منشور کې یې د تنخاګانو دوه چنده زیاتول، د غريبانو لپاره د بجلۍ (برېښنا) ۳۰۰ يونټه وړيا ورکول، د معياري تعليم پروژې عملي کول، د روغتيا وړيا خدمات، له سېلاب ځپلو سره مرستي، له کروندګرو، کارګرانو او ځوانانو سره د مرستو لپاره ځانګړي کارډونه جاري کول شامل دي.
نوموړي دا و نه ويل چې دا اقدامات به په څه ډول کوي ځکه چې پاکستان له يوې مودې راهيسې له اقتصادي بحران او د انرژۍ له کمي سره مخامخ دی.
په پاکستان کې راتلونکي عام انتخابات د ۲۰۲۴ز کال د فبرورۍ پر اتمه کېږي، چې د انتخاباتي کمېشن په وينا، د قامي اسمبلۍ او څلورو واړو صوبايي اسمبليانو د ۱،۰۸۵ څوکيو لپاره ۲۸،۶۲۶ کسانو د نوماندۍ کاغذونه جمع کړي دي.