په شمالي وزیرستان کې د ملي جمهوري غورځنګ د مشر محسن داوړ د ګاډو پر قافله ډزې شوې دي.
پولیس وايي چې پر محسن داوړ نن (د جنورۍ پر درېيمه) د انتخاباتي کيمپېن پر مهال د میرامشا په تپي سیمه کې ناپیژندل شویو وسلوالو ډزې کړې دي. د پولیسو په وینا په ډزو کې د محسن داوړ په ګډون چا ته زیان نه دی رسېدلی.
ملي جمهوري غورځنګ پر دواړ د برید غندنه کړې او د دې د پلټنو غوښتنه یې کړې ده.
د غورځنګ صوبایي مشرې بشره ګوهر د جنورۍ پر درېیمه پر اېکس پاڼه په بیان کې ويلي چې د وسلوالو طالبانو په اړه د ریاست ناسمې تګلارې له کبله په وزیرستان او ټوله پښتونخوا کې ترهګري مخ پر زیاتېدو ده.
ہم نیشنل ڈیموکریٹک موومنٹ کے چیرمین اور این اے 40 کے امیدوار محسن داوڑ پر شمالی وزیرستان کے علاقے تپی میں ہونے والے حملے کی شدید الفاظ میں مذمت کرتے ہیں۔ چیرمین محسن داوڑ اور ہمارے دیگر ساتھی حملے میں محفوظ رہے۔ریاست کی طالبان کے حوالے سے ناقص پالیسیوں کی وجہ سے وزیرستان اور… pic.twitter.com/M2cCi3cggz
— National Democratic Movement (@NDM_Official) January 3, 2024
په بیان کې د پاکستان له انتخاباتي کمېشنه غوښتنه شوې ده چې د نوماندانو د خوندیتوب په اړه بیړنۍ غونډه وکړي.
پولیس وايي د پیښې راپور يې درج کړی دی او په سیمه کې د لټون عملیات کوي.
تراوسه چا د برید ذمه واري نه ده منلې.
د محسن داوړ پر ګاډي د ډزو نښې ليدل کېږي.
دا په داسې حال کې ده چې په پاکستان کې د فبرورۍ پر اتمه عام انتخابات کېږی او د دې لپاره سیاسي ګوندونو هلې ځلې پیل کړې دي. د دې ترڅنګ په سیمه کې د بدامنۍ پیښې هم زیاتې شوي دي.
تر دی وړاندې په ډیره اسماعیل خان کې د جمیعت علماء اسلام (ف) د مشر مولانا فضل الرحمان پر قافله او په باجوړ کې هم پر یو انتخاباتي نوماند ډزې شوې دي.