د بلوچستان د کېچ په تربت سيمه کې وسلوالو د پاکستان مسلم ليګ (ن) ګوند له خوا د قامي اسمبلۍ لپاره د څوکۍ پر احتمالي نوماند مير محمد اسلم بليدي بريد کړی چې نوموړی پکې ژوبل شوی دی.
د کېچ ډيپټي کمېشنر حسین بلوڅ مشال راډيو ته ويلي چې د جنورۍ پر ۱۰مه په شوي بريد کې بليدي څلور ډزه لګېدلی او روغتيايي حالت یې د اندېښنې وړ دی.
نوموړي زياته کړه چې بلیدي په یو ځايي پارک کې ورزش کاوه چې ورباندې حمله وشوه.
پر هغه د حملې ذمه واري لا چا نه ده منلې.
اسلم بليدي يو قبايلي مشر او پخوانی سياستوال دی. نوموړی د بلوچستان اسمبلۍ غړی او صوبايي وزير هم پاتې شوی دی.
هغه د ۲۰۲۳ز کال په وروستيو کې بلوڅ ملتپاله نیشنل ګوند پرېښود او په پاکستان مسلم ليګ (ن) کې شامل شو.
بليدي د فبرورۍ اتمې انتخاباتو لپاره د پاکستان قامي اسمبلۍ د کېچ او پنجګور سیمو لپاره د ۲۵۸مې حلقې څوکۍ ته احتمالي نوماند دی.