د روسيې او اوکراین حکومتونو د یو بل لسګونه بندیان تبادله کړي دي.
د جنورۍ پر ۳۱مه مسکو د اوکراین ۲۰۷ او کییف د روسیې ۱۹۵ بندیان یو بل ته وسپارل.
د دې شمېرو توپیر د دې له امله دی چې د روسیې په بنديانو کې یوازې پوځيان شامل دي. اوکرایني ولسمشر زېلېنسکي د بنديانو د تبادلې په اړه پر ټېلېګرام په بیان کې لیکلي چې " په بند کې زموږ هر کس په ياد دی."
د ۲۰۲۲ز کال په فبرورۍ کې پر اوکراين د روسيې تر یرغل وروسته، د روان کال د جنورۍ په پیل کې دواړو خواوو د بنديانو تر ټولو لويه تبادله کړې وه، چې له مخې يې، د اوکراين د ۲۳۰ جنګي بنديانو په بدل کې ۲۴۸ روسي زندانیان تبادله شوي ول.
په روانه فبرورۍ میاشت کې پر اوکراین د روسیې د یرغل دوه کاله پوره کېدونکي دي. په هغه جنګ کې د دواړو خواوو زرګونه سرتېري وژل شوي هم دي.