د طالبانو د حکومت د کورنیو چارو وزارت وایي، د امریکا د ګوانتنامو د زندان دوه پخواني طالب بندیان یې په هڅو خوشې شوي او کابل ته رسېدلي دي.
د وزارت ویاند عبدالمتین قانع د فبرورۍ پر ۱۲مه پر اېکس پاڼه لیکلي دي چې ملا عبدالظاهر صابر او عبدالکریم اووه کاله مخکې د ګوانتنامو له زندانه عمان ته استول شوي ول او هلته تر څار لاندې ول. پر هغو کسانو نورو هېوادونو ته پر سفر محدویتونه هم ول.
صابر او کریم له ترهګرې شبکې القاعدې سره د تړاو په تور نيول شوي ول.
ښاغلی ملا عبدالظاهر او عبدالکریم د ډیرو سختو او ستونزمنو حالاتو تیرولو وروسته همدا شیبه پخیر کابل ته را ورسیدل.د کابل نړیوال هوايي ډګر ته د اسلامي امارت مشرتابه پلاوۍ، امنیتي ځواکونه او نور عام ولسونه بدرګې او ښه راغلاست ته راغلي.۱/۲
— M. D. Abdul Mateen Qani -المفتي. د. عبدالمتين قانع (@abdulmateenqani) February 12, 2024
د قانع په وینا، ملا صابر د لوګر ولایت د حصارک ولسوالۍ دی چې په ۲۰۰۲ز کال کې امریکايي ځواکونو نیولی وو.
دا راز عبدالکريم د خوست د تڼیو د ولسوالۍ دی او هغه هم پر هم هغه کال پاکستانيو سرتېرو د بلوچستان له سېوۍ څخه نيولی او امريکایانو ته سپارلی وو.