د افغانستان او ايرلينډ کرکټ ملي لوبډلې د درو ۲۰ اووره سیالیو په دویمه لوبه کې یو بل ته مخامخېږي.
د شارجې په لوبغالي کې د مارچ ۱۷مې سیالي د کابل پر وخت د ماخوستن پر اته نیمو او د پېښور پر نهو بجو پیلېږي.
دا په داسې حال کې ده چې ایرلینډ د مارچ پر ۱۵مه په لومړۍ سیالۍ کې کوربه افغانستان ته په ۳۸ منډو ماتې ورکړه.
په هغه لوبه کې لومړی بیټېنګ ایرلینډ وکړ او په ټاکلیو ۲۰ اوورونو کې یې د شپږو لوبغاړو په زیان ۱۴۹ منډې وکړې. په ځواب کې افغان لوبډلې ښه توپوهنه و نه کړای شوه او بیټران یې ژر، ژر وسوځېدل. د افغانستان ټول لوبغاړي په ۱۹م اوور کې په ۱۱۱ منډو وسوځېدل.
ټاکل شوې چې د دواړو لوبډلو ترمینځ وروستۍ سیالۍ د مارچ پر ۱۸مه ترسره شي.
تر دې مخکې، افغان لوبډلې له ایرلینډه د درو ۵۰ اووره یا یو ورځنیو سیالیو لوبلړۍ ګټلې وه خو یوازینۍ ټېسټ سیالي یې ورڅخه بایللې وه.