د خیبر پښتونخوا د کورمې په پیواړ تنګي کې د کاروباري لانجې پر سر په ډزو کې دوه تنه وژل شوي او دوه ژوبل دي.
د پاړه چینار د روغتون مشر ډاکتر میر حسن جان د اپرېل پر څلورمه مشال راډیو ته وویل چې پېښه د اپرېل پر درېیمه شپې مهال شوې ده.
د نوموړي په خبره، هغه کسان له یو بل سره په کاروبار وران شوي ول او پر یو بل یې ډزې کړې دي.
دی وايي، د سیمې خلکو د وژل شویو جسدونه او ژوبل کسان شپې شاوخوا ۱۲ بجې روغتون ته انتقال کړل.
د ډاکتر میر حسن جان په خبره، دوه تنه د پېښې په ځای کې مړه شوي ول او دوه نور ژوبل ول چې اوس یې روغتیايي وضعیت ښه دی.
د سیمې پولیسو لا د پېښې په اړه څه نه دي ویلي.