د اپرېل پر ۱۰مه د پاکستان، افغانستان او سعودي عرب په ګډون په ګڼو اسلامي هېوادونو کې د کوچني اختر لومړۍ ورځ ولمانځل شوه.
د پاکستان په ټولو ښارونو کې د اپرېل ۱۰مې پر سهار د اختر لمونځ وشو او خلکو يو بل ته د اختر مبارکۍ ورکړې.
په پاکستان کې د وړوکي اختر د مياشتې ليدو اعلان د هغه هېواد د رویت هلال مرکزي سرکاري کمېټۍ مشر سيد محمد عبدالخبير ازاد د اپرېل پر نهمه تر روژه مات وروسته په اسلام اباد کې خبري غونډې ته د وينا پر مهال وکړ.
نوموړي زياته کړه چې له خيبر پښتونخوا، سيند او پنجاب صوبو څخه يې د مياشتې ليدو لسګونه شهادتونه تر لاسه کړي دي او دا ډول به په هغه هېواد کې د ۱۴۴۵ هجري قمري کال د شوال مياشتې لومړۍ ورځ د اپرېل پر ۱۰مه وي.
دا هم وګورئ:
په لاهور او کراچۍ کې مذهبي لږکیان مسلمانانو ته روژه ماتی برابرويخوست کې زرګونو کسانو د "یووالي روژه ماتی" کړی دینرښځیان وایي په روژه او اختر کې ورته خپل کور ډېر یادېږيپاکستان کې سږني اختر په سر ناندرۍ مخې ته راغليد شوال پر لومړۍ په ټولې اسلامي نړۍ کې مسلمانان کوچنی اختر يا عيد الفطر لمانځي.
د اپرېل پر ۱۰مه په ګڼو اسلامي هېوادونو او هغو هېوادونو کې چې مسلمانان پکې مېشت دي، وړوکی اختر لمانځل کېږي، خو په هند او بنګلادېش کې د اختر مياشت نه ده لیدل شوې، نو هغوی به د اپریل پر ۱۱مه اختر لمانځي.
په کوټه کې ګڼو خلکو د اپرېل پر ۱۰مه د کوچني اختر لمونځ وکړ.
په پاکستان کې اکثر د روژې او اختر د مياشتو لیدو پر سر اختلافات وي چې له کبله يې په هغه هېواد کې روژه او اختر پر بېلابېلو ورځو کېږي.
هلته په عمومي ډول د مياشتې ليدلو سرکاري کمېټۍ د مياشتې ليدو لپاره ناستو غير سرکاري کمېټيو پرېکړې نه مني او روژه او اختر تر خپل اعلان وروسته کوي.
له هم دې امله، په تېرو وختونو کې به د خيبر پښتونخوا په زياتره برخو کې روژه او اختر پر يوه ورځ او د پاکستان په نورو برخو کې به په بله ورځ وو.
خو سږ کال تر اوږدې مودې وروسته کوچنی اختر په ټول هېواد کې پر یوه ورځ لمانځل کېږي.