د پیسو نړیوال صندوق (ای اېم اېف) پاکستان ته د دريوو اربو ډالرو د پور د اخري برخې ورکولو اعلان کړی.
دې ادارې د اپرېل پر ۲۹مه پر اېکس (پخوانی ټوېټر) ليکلي چې پاکستان ته د پور د يوې بلې برخې ورکولو په اړه یې ارزونه سرته رسېدلې ده. په بیان کې زیاته شوې چې يو اعشاريه يو اربه ډالر به په سمدستي توګه پاکستان ته ورکړل شي.
The IMF Board completed the second and final review under the Stand-By Agreement for Pakistan, allowing for an immediate disbursement of around $1.1 billion. The review’s completion reflects the authorities%27 efforts to stabilize the economy for the welfare of all Pakistanis. pic.twitter.com/fO0ZKD0wtp
— IMF (@IMFNews) April 29, 2024
د دې پیسو تر لاسه کولو او تېرو پورونو د ادا کولو د پروګرام د ارزونې لپاره، د ای اېم اېف او پاکستاني چارواکو ترمینځ مذاکرات د تېر مارچ پر ۱۹مه سرته رسېدلي وو. اسلام اباد او ای اېم اېف په ۲۰۲۳ز کال کې پر داسې مهال د درې اربه ډالرو د پور موافقه کړې وه چې پاکستان یو له تر ټولو سختو اقتصادي بحرانونو سره مخامخ وو.
د دغې نړیوالې ادارې مشرې کرېستالينا ګیورګیېوا د اپرېل پر ۱۱مه په واشنګټن کې د خبرو په وخت ويليوو چې پاکستان بايد ځينې مهمې ستونزې هوارې کړي چې په هغوی کې "د مالیې اساس، په اقتصاد کې د ټولنې د شتمنې برخې ونډه، د ولسي لګښتونو څرنګوالی او د یوه لا زيات شفاف چاپېریال ایجادول" شامل دي.
د هغې ادارې اجراییوي ډلې د ۲۰۲۳ کال د جولای پر ۱۲مه پاکستان ته د درې اربه ډالرو نهه میاشتنی پروګرام تایید کړی وو چې ورسره سم یې ورته د پور لومړی قسط، چې ۱.۲ اربه ډالر جوړېده، ورکړ.
ای اېم اېف د روان کال په جنورۍ کې پاکستان ته د څه باندې ۷۰۵ مېليونه ډالرو پور دويم قسط ورکړی وو. پاکستان له ۲۰۱۹ کال راهیسې له ډير اقتصادي بحران سره مخامخ دی او پر هم هغه کال یې د پیسو له نړیوال صندوق سره د شپږو اربو ډالرو د پور درې کلن تړون لاسلیک کړی وو.